Jambylda eki alǵany úshin ata-anasynan urys estigen bala úıinen qashyp ketken

TARAZ. KAZINFORM – Jyl basynan beri Jambyl oblysynda kámeletke tolmaǵan jasóspirimderdiń úıden ketip qalýynyń 242 deregi tirkeldi.

Olardyń 215-i bir táýlikte, qalǵandary birneshe táýlik ishinde tabylǵan. 

«Qazirgi jasóspirimder óz betinshe úıden nege ketip qalady? Statıstıkalyq taldaý nátıjeleri onyń negizgi sebepteri - otbasyndaǵy janjal jaǵdaılary, ata-analardyń jumys bastylyǵy, osydan baryp balalardyń bos ýaqyty men baılanys ortasyna qatysty baqylaýdyń bolmaýy, kámeletke tolmaǵandardyń bos ýaqytynyń durys uıymdastyrylmaýy, kompıýterlik oıyndarǵa degen áýestik, otbasyndaǵy qolaısyzdyq», - deıdi bul jóninde Jambyl oblysy Polıtsııa departamentiniń jergilikti polıtsııa qyzmeti basqarmasy ıývenaldyq polıtsııa tobynyń erekshe tapsyrmalar jónindegi aǵa ınspektory Álisher Qalyshev.

Balalar naqty mekenjaıdy bilmeı, avtobýspen júrip nemese úıden uzap bara jatqanda adasyp ketý, kezdeısoq ketý jaǵdaıy sırek kezdesýde. Máselen, 17 jastaǵy jasóspirim shkaftaǵy zattardy aqtaryp júrip, ájesiniń jasyrǵan aqshasyn taýyp alyp, oǵan uıaly telefon satyp alǵan. Muny bilgen ájesi nemeresine ursady, al ol renjip, úıden jasyryn ketip qalady. Polıtsııa jasóspirimdi tańerteń úıden 35 shaqyrym jerden tapqan.

Al 13 jasar balaǵa sabaqtan tómen baǵa alǵany úshin ata-anasy urysyp, ol eshbir eskertpesten, dosynyń úıine qonady. Osyǵan qatysty ata-analarmen jáne kámeletke tolmaǵan jasóspirimdermen profılaktıkalyq áńgimeler ótkizilgen.

Qazirgi tańda úıden ketken barlyq jasóspirimder tabylyp, ata-analaryna qaıtarylǵan. Jáne balalarǵa qatysty ne olardyń qatysýymen jasalǵan qandaı da bir qylmys jasaý faktileri olardy izdestirý kezeńinde tirkelmegen. Barlyq balalardy izdeýge tek polıtsııa qyzmetkerleri ǵana emes, eriktiler men osyǵan beı-jaı qaramaıtyn belsendi azamattar da qatysqan.