Jambylda burynǵy qoıshy 72 maldy urlady degen kúdikpen ustaldy
ASTANA. KAZINFORM — Jambyl oblysy Baızaq aýdanyndaǵy sharýa qojalyǵynyń qorasynan birneshe ret mal urlanyp, jalpy 72 qoı qoldy bolǵan, dep habarlaıdy Іshki ister mınıstrliginiń baspasóz qyzmeti.
Atalǵan derek boıynsha QR Qylmystyq kodeksiniń mal urlyǵy babymen sotqa deıingi tergeý amaldary bastaldy.
Polıtsııa qyzmetkerleri júrgizgen jedel is-sharalar barysynda qylmysqa qatysy bar degen kúdikpen úsh er adam anyqtalyp, ustaldy. Olardyń biri qoranyń ornalasýyn jáne maldy baǵý tártibin jaqsy biletin, sharýa qojalyqta buryn qoıshy bolyp jumys istegen.
Tergeý barysynda urlanǵan maldyń bir bóligi tabylyp, zańdy ıesine qaıtaryldy.
— Kúdiktiler ýaqytsha ustaý abaqtysyna qamaqqa alyndy. Qazir istiń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr, — delingen habarlamada.
Jalpy, Jambyl oblysynda jyl basynan beri mal urlyǵy boıynsha 18 qylmys ashylyp, 32 azamat ustaldy. Sondaı-aq polıtsııa qyzmetkerleriniń jedel jumysynyń nátıjesinde mal urlaýmen aınalysqan 10 adamdar tobynyń áreketine tosqaýyl qoıyldy.
Polıtsııa azamattardy maldarynyń qorajaılaryna tıisti qaýipsizdik sharalaryn qamtamasyz etip, jaýapkershilikpen qaraýǵa jáne quqyq buzýshylyq derekteri týraly der kezinde polıtsııaǵa habarlaýǵa shaqyrady.
Buǵan deıin SQO-da satyp alýshynyń qyraǵylyǵy mal urlyǵyn jedel ashýǵa kómekteskenin jazdyq.
