Jambylda bulaqtardy zertteý jáne túgendeý jumystary júrgizilip jatyr
ASTANA. KAZINFORM — Zertteý barysynda bulaqtardyń sanıtarlyq jáne tehnıkalyq jaı-kúıine baǵa berilip, naqty koordınattary anyqtalady, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Jambyl oblysynyń aýmaǵynda «Qazgıdrogeologııa» ulttyq gıdrogeologııalyq qyzmetiniń mamandary Qazaqstan bulaqtarynyń biryńǵaı derekter bazasyn jasaý aıasynda bulaqtardy zertteý jáne túgendeý boıynsha dalalyq jumystardy jalǵastyryp jatyr.
Zertteý barysynda bulaqtardyń sanıtarlyq jáne tehnıkalyq jaı-kúıine baǵa berilip, naqty koordınattary anyqtalady, gıdrogeologııalyq baqylaýlar júrgizilip, zerthanalyq taldaý úshin sý synamalary alynady. Jınalǵan málimetter tabıǵı sý kózderi týraly aqparatty ózektendirýge jáne olardy odan ári esepke alý men monıtorıng júrgizýdi qamtamasyz etýge múmkindik beredi.
Bul jumystar tabıǵı sý nysandaryn saqtaýǵa, gıdrogeologııalyq aqparattyń sapasyn arttyrýǵa jáne elimizdiń sý resýrstaryn utymdy paıdalanýǵa baǵyttalǵan.
— Bulaqtar — tuşy sýdyń mańyzdy kózi ári Qazaqstannyń tabıǵı baılyǵynyń ajyramas bóligi. Búginde biz bulaqtardyń jaı-kúıin jan-jaqty baǵalaýǵa, olardy saqtaýǵa baǵyttalǵan sharalardy ýaqytyly qabyldaýǵa jáne áleýetin tıimdi paıdalanýǵa múmkindik beretin zamanaýı ári senimdi derekter bazasyn qalyptastyryp jatyrmyz. Bul jumys elimizdiń sý qaýipsizdigin qamtamasyz etý jáne óńirlerdiń turaqty damýyna yqpal etý turǵysynan erekshe mańyzǵa ıe, — dedi «Qazgıdrogeologııa» ulttyq gıdrogeologııalyq qyzmeti basqarmasynyń tóraǵasy Bolat Beknııaz.
Budan buryn Prezıdenttiń Іs basqarmasy «Móldir bulaq» aktsııasyna qatysqanyn jazǵan edik.
