Jambylda birneshe jyl boıy izdeýde júrgen 9 qylmysker ustaldy
ASTANA. KAZINFORM — Jambyl oblysynda bir aıdyń ishinde izdeýdegi 25 adam tabylyp, 9 qylmysker quryqtaldy.
Jambyl oblysynyń polıtseıleri keıingi bir aı ishinde polıtsııa qyzmetkerleri iz-tússiz joǵalǵan 25 adamnyń júrgen jerin anyqtady. Olardyń barlyǵy jaqyndarymen qaýyshty.
Sonymen qatar jedel-izdestirý is-sharalarynyń nátıjesinde izdeýde júrgen 9 qylmysker ustaldy. Olardyń arasynda alaıaqtyq, esirtki jáne urlyq qylmystaryn jasaǵan azamattar bar. Keıbiri birneshe jyl boıy izdeýde bolǵan.
Odan bólek, probatsııalyq baqylaýdan jaltarǵan adamdardy da izdep, anyqtaý jumystary júrgizilip jatyr. Jyl basynan beri osyndaı mindettemeden jaltarǵan 12 adam tabyldy.
Ustalǵandardyń árqaısysy jasaǵan quqyqqa qaıshy áreketteri úshin zań aldynda jaýap beredi.
Eske salaıyq, buǵan deıin adamdardyń jeke derekterin zańsyz paıdalanyp, 2 mlrd teńge nesıe alǵan qylmystyq top ustalǵanyn habarlaǵanbyz.
