Jambylda balalardyń qaýipsizdigine qatysty profılaktıkalyq sharalar kúsheıtildi
TARAZ. KAZINFORM — Jambyl oblysy polıtsııa departamenti kámeletke tolmaǵandardyń qaýipsizdigin qamtamasyz etý maqsatynda keshendi profılaktıkalyq jumystar júrgizip jatyr, dep habarlaıdy Іshki ister mınıstrliginiń baspasóz qyzmeti.
Kámeletke tolmaǵandardyń qaýipsizdigin qamtamasyz etý — polıtsııa qyzmetiniń basty basymdyqtarynyń biri. Osy baǵytta Jambyl oblysy polıtsııa departamentiniń qyzmetkerleri júıeli túrde profılaktıkalyq jumystar júrgizip keledi. Atap aıtqanda nashaqorlyqtyń aldyn alý, jol qaýipsizdigin qamtamasyz etý, sondaı-aq jasóspirimder arasyndaǵy býllıng pen zorlyq-zombylyqtyń aldyn alýǵa baǵyttalǵan is-sharalar turaqty túrde uıymdastyrylyp jatyr.
— Jyl basynan beri polıtsııa qyzmetkerleri múddeli memlekettik organdar men uıymdar ókilderimen birlesip 5 zııatkerlik oıyn men baıqaý ótkizip, 1 325 dáris pen túsindirý áńgimesin, 18 dóńgelek ústel men 34 ata-analar jınalysyn uıymdastyrdy. Bul sharalar balalar men jasóspirimderdiń quqyqtyq mádenıetin arttyrýǵa, sondaı-aq olardyń jeke qaýipsizdigine sanaly kózqaras qalyptastyrýǵa baǵyttalǵan. Túsindirý jumystaryna erekshe mán berilip otyr. Polıtsııa qyzmetkerleri mektep oqýshylary men stýdenttermen kezdesýler ótkizip, tyıym salynǵan zattardyń zııany, olardyń adam densaýlyǵyna tıgizetin keri áseri jáne esirtki quraldarynyń zańsyz aınalymyna qatysqany úshin kózdelgen zańnamalyq jaýapkershilik týraly jan-jaqty aqparat beredi. Sonymen qatar, ınternet pen áleýmettik jeliler arqyly jasóspirimderdi quqyqqa qaıshy áreketterge tartýdyń aldyn alý máselesi de basty nazarda, — delingen habarlamada.
Jol qaýipsizdigin qamtamasyz etý de profılaktıkalyq jumystyń mańyzdy bóligi sanalady. Quqyq qorǵaý organdarynyń qyzmetkerleri oqýshylarǵa jol qozǵalysy erejelerin únemi eske salyp, bilim berý uıymdarynyń mańynda profılaktıkalyq reıdter júrgizedi. Sondaı-aq júrgizýshilerdiń kámeletke tolmaǵandardy tasymaldaý talaptaryn saqtaýyna jáne jaıaý júrginshiler ótkelderinen qaýipsiz ótý qaǵıdalarynyń oryndalýyna baqylaý jasalady.
Býllıng pen zorlyq-zombylyqtyń aldyn alý maqsatynda polıtsııa qyzmetkerleri pedagogter men psıhologtarmen birlesip trenıngter men taqyryptyq kezdesýler uıymdastyryp, jasóspirimder arasynda qaýipsiz qarym-qatynas mádenıetin, ózara qurmet pen jeke jaýapkershilik daǵdylaryn qalyptastyrýǵa basymdyq berip otyr.
Jambyl oblysy polıtsııa departamenti balalardyń qaýipsizdigi — ata-analardyń, pedagogterdiń, quqyq qorǵaý organdarynyń jáne tutas qoǵamnyń ortaq jaýapkershiligi ekenin atap ótedi. Tek birlese áreket etý arqyly ǵana óskeleń urpaq úshin qaýipsiz ári qolaıly orta qalyptastyrýǵa bolady.
Buǵan deıin Jambyl oblysynyń Sarysý aýdanynda tótenshe jaǵdaı jarııalanǵanyn jazǵanbyz.