Jambylda aýyr júk kólikterine 64,5 mıllıon teńge aıyppul salyndy

TARAZ. KAZINFORM – Bıyl Jambyl oblysynda jol jóndeý jumystarynyń sapasyn qamtamasyz etý úshin Jol aktıvteri ulttyq sapa ortalyǵyna bıýdjetten 220, 8 mln. teńge bólingen. 

Sóıtip jyl basynan Sapa ortalyǵy jóndelgen joldardyń 228 jerinen 962 synama alǵan. Nátıjesinde 538 synamada sáıkessizdikter men men kemshilikter anyqtaldy. Negizi jol jóndeý baǵytyndaǵy jobalardyń basym bóliginde tapsyrys berýshi – aýyldyq okrýg ákimderi. Alaıda olarda jol salasy boıynsha mamandardyń bolmaýynan qadaǵalaý durys atqarylmaıdy. 

«Avtojoldardyń merziminen buryn buzylýynan saqtap qalý maqsatynda Kóliktik baqylaý ınspektsııasymen birlesip, oblys joldarynda reıdter uıymdastyrylyp, bıylǵy jyldyń 8 aıynda jyljymaly kóliktik baqylaý beketterinde 1 386 ákimshilik hattamalar toltyryldy. Nátıjesinde 64,5 mln. teńge aıyppul salynyp, jergilikti bıýdjetke 54,0 mln. teńge óndirildi», - deıdi bul jóninde Jambyl oblysy ákiminiń orynbasary Qanatbek Mádibek.

Degenmen Kóliktik baqylaý ınspektsııasynda jyljymaly beketter jetispeýinen joldardy tolyq baqylap úlgermeıdi. Jumys tıimdiligin arttyrý úshin avtojoldarda avtomatty ólsheý júıelerin ornatý usynyldy. Oǵan aýyr salmaqty júk kólikteriniń qozǵalys jıiligi joǵary 9 jol telimi anyqtaldy. Qosymsha oblys ortalyǵyna kire beristegi 11 baǵyt zerdelendi.

Avtomatty ólsheý júıelerin ornatý 3 kezeńge bólip ornatý josparlanyp otyr. 1 dana avtomatty ólsheý júıesin ornatý quny – 138 mln. teńge.

Aıta ketsek, biz buǵan deıin keıingi 3,5 jylda jol jóndeý salasynda 65 sybaılas jemqorlyq deregi anyqtalǵanyn jazǵan bolatynbyz.