Jambylda aýylsharýashylyq sýbsıdııalary kezeksiz berilip kelgen
TARAZ. KAZINFORM – QR Sybaılas jemqorlyqqa qarsy qyzmettiń Jambyl oblysy boıynsha departamenti oblys ákimdiginiń aýyl sharýashylyǵy basqarmasy tarapynan sýbsıdııa ótinimderin qaraý kezinde kezektilikti saqtamaý faktilerin anyqtady.
Sýbsıdııalaý salasyna júrgizilgen monıtorıng barysynda sýbsıdııa tóleý kezinde kezektilikti júıeli túrde saqtamaý, sýbsıdııany ýaqtyly tólemeý jáne jekelegen sharýalarǵa artyqshylyq kórsetý túrindegi jemqorlyqqa alyp keletin táýekelder anyqtalǵan.
Mysaly, 2023 jylǵy shilde aıynda kezekke turǵan aýyl sharýashylyǵy taýar óndirýshileriniń ótinimderinen buryn, kezekke keıinirek turǵan, ıaǵnı 2023 jyldyń qazan aıyndaǵy ótinimder qaralyp, olarǵa sýbsıdııa tólengendigi belgili boldy.
Atalǵan kemshilikter sýbsıdııalaýdyń biryńǵaı memlekettik aqparattyq júıesi men «Qazynashylyq» aqparattyq júıeleri arasynda ıntegratsııanyń joqtyǵynan jáne jekelegen qyzmetkerlerde dıskretsııalyq ókilettikterdiń bolýynan oryn alǵan.
Departamenttiń usynysynan keıin oblystyq aýyl sharýashylyǵy basqarmasy sýbsıdııa tóleý boıynsha tólem qujattaryn qaraý algorıtmin bekitti jáne der kezinde qaralmaǵan 243 aýyl sharýashylyǵy taýar óndirýshileriniń sýbsıdııalary tólendi.
Aıta ketsek, biz buǵan deıin sharýalardan túsken 123 myń sýbsıdııa ótinishiniń 67 myńy ǵana maquldanǵanyn jazǵan bolatynbyz.
