Jambylda atpen temeki kontrabandasyn ótkizbek bolǵan sheteldik azamat ustaldy
ASTANA. KAZINFORM — Jambyl oblysynyń Jýaly aýdanynda temeki ónimderin zańsyz alyp ótý áreketiniń joly kesildi. Bul týraly Jýaly aýdandyq sotynyń baspasóz qyzmeti habarlady.
Sot Qyrǵyzstan azamaty S.-ǵa qatysty eki ákimshilik isti qarady. Ol Qazaqstan Respýblıkasynyń Ákimshilik quqyq buzýshylyq týraly kodeksiniń 283-babynyń 2-bóligi (tańbalanýǵa jatatyn aktsızdeletin taýarlardyń zańsyz aınalymy) jáne 514-babynyń 2-bóligi (memlekettik shekara rejımin buzý) boıynsha jaýapqa tartyldy.
Іs materıaldaryna sáıkes, 2025 jylǵy qarasha aıynda túngi ýaqytta shekara qyzmetiniń qyzmetkerleri Qazaqstan aýmaǵyna atpen temeki kontrabandasyn alyp ótpek bolǵan Qyrǵyzstan azamatyn memlekettik shekarany zańsyz kesip ótý kezinde ustaǵan. Tekserý barysynda odan «ORIS» markaly 2 myń qorap temeki tárkilendi.
— Sot otyrysynda quqyq buzýshy óz kinásin tolyq moıyndap, jasaǵan áreketine ókinish bildirdi. Sot qaýlysymen azamat S. kináli dep tanylyp, Qazaqstan Respýblıkasynyń aýmaǵynan ákimshilik jolmen shyǵaryldy. Sondaı-aq temeki ónimderi men jylqy memleket kirisine tárkilenip, 137 myń teńge kóleminde aıyppul salyndy, — delingen habarlamada.
Sot sheshimi zańdy kúshine endi.
Osyǵan deıin Qazaqstan men Qyrǵyzstan shekarasynda «tis kontrabandasynyń» joly kesilgenin jazǵan edik.