Jambylda ákimder áli bitpegen jumystarǵa qarjy aýdaryp jibergen

TARAZ. KAZINFORM – Jambyl oblysyndaǵy Ádep jónindegi keńes otyrysynda úsh aýyl ákiminiń tártibi qaraldy.

Osy jyldyń sáýirinde Merki aýdany Aqtoǵan aýyldyq okrýgi ákimi apparaty men «Merki joldary» JShS arasynda osy okrýgtegi 5 kósheni orta jóndeýden ótkizý jumystary boıynsha 232 mln teńgege ashyq konkýrs tásilimen kelisim-shart jasalǵan.

Maýsym aıynda Aqtoǵan aýyldyq okrýginiń ákimi oryndalǵan jumystar úshin 111 mln-nan astam teńgeni merdigerdiń esepshotyna aýdarady. Alaıda keıinnen sarapshy 48 mln-nan astam teńgege qum-shaǵal tóseý jáne taǵy basqa jumystardyń atqarylmaǵanyn anyqtaǵan.

Al, Sarymoldaev aýyldyq okrýgi ákimi apparaty «BaıBatyr 01» JShS-men Jylysbaev kóshesin orta jóndeýden ótkizý jumystary boıynsha jalpy quny 15 mln teńgege bir kózden satyp alý tásilimen kelisimshart jasaǵan. Biraq oryndalǵan jumystar týraly akti berilmesten, merdigerge qubyrlardy montajdaý jumystaryna 6 039 687 teńge kólemindegi bıýdjet qarajatyn aýdarǵanymen taldaý barysynda 3,6 mln-ǵa jýyq teńgeniń jumystary oryndalmaǵany belgili boldy.

Sondaı-aq, osy aýyldyq okrýg «Qazaq joly 2050» JShS-men Raşýpkın kóshesiniń 8 burylysyn ortasha jóndeý úshin 46 574 713 teńgege kelisimshartqa otyrady. Alaıda sala mamandary asfalt jabyndysynyń sapasy tıisti talaptarǵa sáıkes kelmeıtinin, ıaǵnı joldyń tegis emestigi jáne ár jerlerde shuńqyrlardyń bar ekenin anyqtaǵan.

Osyndaı kemshilikter bola tura aýyl ákimi qarajatty tolyǵymen aýdaryp jibergen.

Jáne Aqermen aýyldyq okrýgi ákimi apparaty men «Alaman Story Group KZ» JShS arasynda 12 avtomobıl joldaryn orta jóndeýden ótkizý boıynsha jalpy quny 187,5 mln teńgege kelisimshart jasalyp, okrýg ákimi merdigerdiń esepshotyna qarajat aýdarǵan.

Alaıda Sybaılas jemqorlyqqa qarsy qyzmetpen tartylǵan sarapshy taldaý barysynda jalpy 18,7 mln teńgeniń oryndalmaǵan jumystaryn anyqtady.

Atalǵan faktiler boıynsha qozǵalǵan tártiptik ister Qazaqstan Respýblıkasy Memlekettik qyzmet isteri agenttiginiń Jambyl oblysyndaǵy Ádep jónindegi keńesi otyrysynda qaralyp, tıisti aýyl ákimderine «qyzmetterine tolyq sáıkes emestigi týraly eskertý» túrindegi tártiptik jaza qoldaný usynyldy.

Aıta ketsek, biz buǵan deıin bıligi men qarjysy joq aýyl ákimderi problemany sheshýge qaýqarsyz ekenin jazǵan bolatynbyz.