Jambylda 36 qyzmetkerge tólengen ústemeaqyny qaıtarý týraly buıryq zańsyz dep tanyldy

TARAZ. KAZINFORM – Jambyl oblysynda ortalyqtandyrylǵan býhgalterııanyń 36 qyzmetkerine tólengen ústemeaqyny qaıtarýdy talap etken buıryq sotta zańsyz dep tanyldy.

Joǵarǵy sottyń deregine qaraǵanda, Jambyl oblysy boıynsha aýdandyq bilim bólimderiniń buıryqtarymen 2021 jyldan bastap býhgalterler, ekonomıster jáne is júrgizýshilerdiń qyzmet kórsetý aýmaǵy keńeıtilip, olardyń jalaqysyna 50 paıyzdyq ústemaqy belgilengen.

Alaıda 2023 jyly júrgizilgen aýdıt qorytyndysy boıynsha bilim bólimine 21,8 mln teńgeni bıýdjetke qaıtarý mindettelgen. Osydan keıin bólim basshylyǵy tólengen ústemaqylardy «artyq tólengen» dep eseptep, ortalyqtandyrylǵan býhgalterııa qyzmetkerlerinen bul somany óndirý týraly buıryq shyǵarǵan.

- Qyzmetkerler buıryqpen kelispeı, sotqa júgingen. Sot talqylaýy barysynda qosymsha tólemderdiń tolyqtaı zańdy negizde – Eńbek kodeksine, ujymdyq shartqa jáne jumys berýshiniń ishki normatıvtik aktilerine sáıkes tólengeni anyqtaldy.

Sot sheshiminde atalǵan tólemder qyzmetkerlerdiń jalaqysynyń quramdas bóligi bolyp tabylatyny jáne Azamattyq kodekstiń 960-baby boıynsha, eger tólem alýshy tarapynan teris áreket bolmasa, alynǵan somalar qaıtarylýǵa jatpaıtyny kórsetildi, - dep habarlady vedomstvodan.

Nátıjesinde 36 qyzmetkerdiń talap qoıýy qanaǵattandyrylyp, jumys berýshiniń tólemderdi qaıtarý týraly buıryǵy zańsyz dep tanylyp, kúshi joıyldy.

Aıta keteıik, Jambyl oblysynda turmystyq zorlyq-zombylyq kórgen 70 áıel kómek surady.