Jambylda 30 jylda alǵash ret aryqtar arnaıy tehnıkamen tazartyldy
ASTANA. KAZINFORM — 2026 jylǵy vegetatsııa kezeńine daıyndyq aıasynda «Qazsýshar» RMK Jambyl fılıaly aımaqtaǵy onǵa jýyq jer aryqtaryn mehanıkalyq ádispen tazartyp jatyr, dep habarlaıdy Sý resýrstary jáne ırrıgatsııa mınıstrligi.
Bul jumysqa Sý resýrstary jáne ırrıgatsııa mınıstrligi usynǵan jańa arnaıy tehnıka tartylǵan. Laı, qıyrshyq tas jáne ósimdikterden tazartý sý shyǵynyn azaıtyp, aryqtar arqyly egistik alqaptaryna sýdy tıimdirek jetkizýge múmkindik beredi. Mehanıkalyq tazartý jumystary qazan aıynyń ortasynda bastalǵan bolatyn. Bul jumysty sýarý maýsymy bastalǵanǵa deıin tolyq aıaqtaý josparlanyp otyr. Jambyl oblysynyń dıqandary jer aryqtaryn jedel ári tıimdi tazartqan jergilikti «Qazsýshar» fılıaly men Sý resýrstary jáne ırrıgatsııa mınıstrligine alǵysyn bildirdi.
— «Sulýtór» kanaly taýdan bastaý alyp, 120 gektardan astam jońyshqa alqabyn sýmen qamtyp otyr. Aryqtyń tazartylmaǵanyna 30 jyl boldy. Buryn aýyl turǵyndarymen jınalyp, aryqty taýǵa deıin kúrekpen tazalaıtynbyz. Odan beri qansha jyl ótti. Aryq bitelip, shóp ósip ketken edi. Sonyń saldarynan aýylǵa sý durys jetpeıtin. Mine qazir «Qazsýshardyń» Jambyl fılıaly aýdanymyzǵa tehnıka bólip, bir aptanyń ishinde aryqtardy tazalap berdi. Osy jumys úshin Sý resýrstary jáne ırrıgatsııa mınıstrligi men fılıalǵa alǵys aıtamyn. Men 11 gektar jerge jońyshqa ektim. Sý esh kedergisiz ýaqytyly kelip tur. Buryn aryqqa shóp ósip, qoqystar jınalyp, bitelip qalǵan edi. Sonyń saldarynan sý jan-jaqqa aǵyp, ysyrap bolatyn. Endi kóktemnen beri sý jaqsy kelip tur, — dedi «Sulýtór» sharýa qojalyǵynyń basshysy Nurǵalym Shaǵyrbaev.
Aıta keteıik, bıyl Sý resýrstary jáne ırrıgatsııa mınıstrligi «Qazsýshar» RMK Jambyl fılıalyna 75 tehnıka men avtokólik berdi. Olardyń qatarynda ekskavator-júk tıegishter, shynjyr tabandy ekskavatorlar, traktorlar, tirkemeler, sý tasıtyn kólikter, samosvaldar, avtokrandar, tirkemeler, aspaly jabdyqtar, dızeldi generatorlar jáne t. b. bar.
Osydan buryn Jambyl oblysynda aldaǵy vegetatsııa kezeńinde sý tapshylyǵy qaýpi bar ekenin jazǵan edik.