Jambylda 27 kásipkerdi qujattaryn jyl saıyn qaıta rásimdeýge májbúrlegen
ASTANA. KAZINFORM — Jambyl oblysynyń Sarysý aýdanynda kommýnaldyq kásiporyn kásipkerlerge tehnıkalyq sharttardy zańda kózdelgen úsh jyldyń ornyna bir jylǵa ǵana berip kelgen. Sonyń saldarynan iri ınvestor men 26 kásipkerdiń quqyǵy buzylǵan. Bul týraly Kazinform agenttiginiń tilshisi habarlady.
Jambyl oblysynyń prokýratýrasy tabıǵı monopolııa sýbektileriniń qyzmetin tekserý barysynda zańbuzýshylyqtardy anyqtaǵan. Qujattardy qysqa merzimge rásimdegen — «Jańatas-Sý-Jylý» kommýnaldyq memlekettik kásiporny.
Atap aıtqanda, 2023 jyldan beri mıneraldy tyńaıtqysh óndirý jobasyn júzege asyryp jatqan «Evrohım» JShS osyndaı jaǵdaıǵa tap bolǵan. Investor sý, jylý jáne káriz júıelerine qosylýǵa arnalǵan tehnıkalyq sharttardy jyl saıyn qaıta rásimdeýge májbúr bolǵan.
Ár rásimdeý jumysy 15 kúntizbelik kúnge deıin sozylǵan. Qadaǵalaý organynyń málimetinshe, qujattardy qaıta-qaıta rásimdeý qajettigi kásipkerlerge negizsiz ákimshilik kedergiler týǵyzǵan.
Aýdan prokýratýrasynyń aralasýynan keıin ınvestor men taǵy 26 kásipkerdiń tehnıkalyq sharttary úsh jyl merzimge qaıta rásimdeldi. Zańbuzýshylyqqa jol bergen laýazymdy tulǵa tártiptik jaýapkershilikke tartyldy.
Eske salaıyq, buǵan deıin Jambyl oblysynda ınvestorǵa salynǵan 1,5 mln teńge aıyppuldyń kúshi joıylǵan edi.
