Jambylda 25 myń teńge úshin TikTok-ta alaıaqtyq jasaǵan áıel 2,5 jylǵa sottaldy
ASTANA. KAZINFORM — Jambyl oblysynyń Jambyl aýdandyq soty TikTok áleýmettik jelisi arqyly jıhaz satamyn dep alaıaqtyq jasaǵan áıelge qatysty qylmystyq isti qarady.
Sot materıaldaryna sáıkes, 2026 jyldyń sáýir aıynda sottalýshy TikTok jelisinde dıvan satatyny týraly jalǵan habarlandyrý jarııalaǵan. Habarlandyrýǵa qyzyǵýshylyq tanytqan turǵyn aktsııamen 60 myń teńgege usynylǵan dıvandy satyp almaq bolyp, kórsetilgen nómirge habarlasqan.
Satýshy aldyn ala tólem qajet ekenin aıtyp, satyp alýshyny 25 myń teńgeni úshinshi tulǵanyń bank shotyna aýdarýǵa kóndirgen. Alaıda aqsha túskennen keıin jıhaz jetkizilmeı, satýshymen baılanys úzilgen.
Aldanǵanyn túsingen jábirlenýshi quqyq qorǵaý organdaryna júgingen.
Sot barysynda sottalýshynyń kinási taraptardyń jáne kýálardyń aıǵaqtarymen, bank túbirtekteri men ózge de is materıaldarymen dáleldendi.
Aıyptalýshy óz kinásin tolyq moıyndap, jasaǵan isine ókinish bildirgen jáne keltirilgen materıaldyq shyǵyndy tolyq ótegen. Jábirlenýshi de zalaldyń ótelgenin rastap, sottan zańǵa sáıkes jaza taǵaıyndaýdy suraǵan.
Sot kináni moıyndaý, shynaıy ókiný jáne keltirilgen zalaldy óteýdi jeńildetetin mán-jaılar retinde eskerdi. Alaıda sottalýshynyń buǵan deıin de birneshe ret alaıaqtyq qylmysy úshin jaýapqa tartylǵany jáne burynǵy jazasynan tıisti qorytyndy shyǵarmaı, qaıtadan osyndaı qylmys jasaǵany nazarǵa alyndy.
— Sot úkimimen áıel Qazaqstan Respýblıkasy Qylmystyq kodeksiniń 190-baby 2-bóliginiń 4) tarmaǵy boıynsha kináli dep tanylyp, úkimderdiń jıyntyǵy negizinde 2 jyl 6 aı merzimge bas bostandyǵynan aıyryldy. Úkim zańdy kúshine endi, — delingen habarlamada.
Budan buryn Jetisý oblysynda bank shottaryn alaıaqtarǵa bergen eki qylmystyq top áshkerelengenin jazdyq.
