Jambyl turǵyndary bankrottyq rásimine jıi júgine bastaǵan
ASTANA. KAZINFORM — Óńir turǵyndary qaryz máselesin sheshý úshin sot rásimderine jıirek júgine bastady. Bul týraly Kazinform agenttiginiń tilshisi habarlady.
2026 jyldyń alǵashqy alty aıynda sottarǵa azamattardyń tólem qabilettiligin qalpyna keltirý nemese olardy bankrot dep taný týraly 632 talap-aryz túsken. Ótken jyldyń osy kezeńinde mundaı ótinishterdiń sany 275 bolǵan. Osylaısha, bir jyl ishinde olardyń sany 357-ge artyp, shamamen 130 paıyzǵa kóbeıgen.
Jambyl oblystyq sotynyń málimetinshe, mundaı ósimniń basty sebebi — keıbir turǵyndardyń bank aldyndaǵy qarjylyq mindettemelerin ýaqytynda oryndaı almaýy. Sondyqtan olar sotqa júginý arqyly tólem qabilettiligin qalpyna keltirýge nemese zańda belgilengen tártippen bankrottyq rásiminen ótýge tyrysýda.
Bul úrdis óńirdegi qarjylyq daýlar sanynyń jalpy ósýimen qatar baıqalyp otyr. Jyl basynan beri sottarǵa banktik kelisimsharttar, faktorıng jáne mıkroqarjy uıymdarynyń qyzmetine qatysty 7 235 talap-aryz túsken. Al ótken jyldyń osy kezeńinde olardyń sany 4 008 bolǵan.
Sonyń nátıjesinde ótken jyldan qalǵan isterdi qosa eseptegende, sottardyń óndirisinde barlyǵy 24 288 azamattyq is qaralǵan. Bul ótken jyldyń kórsetkishimen salystyrǵanda 49,2 paıyzǵa kóp.
Eske sala keteıik, bankrottyqty rásimdeý protsesi jeńildetildi.
