Jambyl polıtsııasynyń elektromobıli qylmyskerdi qýǵanda óship qalmaı ma – ákim jaýaby

Jambyl oblysynyń ákimi Erbol Qarashókeev óńirde elektr energııasy jetispeı jatqanda polıtsııa patrýline elektromobıl alý sheshiminiń durystyǵyn túsindirdi, dep habarlaıdy Kazinform.

«Bizde munaı óńdeý zaýyttarynda da problema bar, mundaı qısynǵa súıensek, birden at-arbaǵa aýysaıyq, jem-shóppen eshqandaı problema bolmaıdy. Men, árıne, ásirelep otyrmyn, biraq is júzinde kórshilerimizdiń tájirıbesine qaraıyq. Qytaı Halyq Respýblıkasyndaǵy kóliktiń jartysynan kóbi – elektromobılder. Olarda esh másele joq. Ekinshi másele – buǵan bizdiń júıeniń daıyn bolýy», - dedi Erbol Qarashókeev Ortalyq kommýnıkatsııalar qyzmetinde tilshiler suraǵyna jaýap bergende.

Sondaı-aq, ákim qylmyskerdi qýǵanda elektromobıldiń qýaty taýsylyp qalmaı ma degen suraqqa jaýap berdi.

«Ortasha alǵanda bizde bir ekıpaj táýligine 100-150 shaqyrym júredi, al elektr kólikterimen 450 shaqyrymǵa deıin júrýge bolady. Bul sheshimdi qabyldaǵanda jaýapty tulǵalar barlyq syn-qaterdi eskerdi dep oılaımyn. Biz patrýldi elektromobılge mingizgen alǵashqy jetekshi oblys retinde qandaı da bir problemalar bolatynyn túsinemiz. Biraq biz odan bas tartpaýymyz kerek, álem osy baǵytqa aýysýda. Meniń pikirimshe, 5-7 jyldan keıin elektromobıl úlesi artady, bul ekologııalyq taza bolady jáne jumystardyń ózindik quny jaǵynan tıimdi bolmaq», - dep tolyqtyrdy ákim.

Erbol Qarashókeev batareıalardy kádege jaratý máselesi bar ekenin moıyndady, biraq onyń sheshiletinin jáne búkil álem oǵan sheshim izdep jatqanyn aıtty.

«Pılottyq jumys bastaldy, biz ony muqııat qadaǵalaımyz, sodan keıin Úkimetpen birge durys sheshim qabyldaımyz dep oılaımyn. Biz pılottyq jobanyń barlyq oń jáne teris jaqtaryn aıtýǵa ýáde beremiz», - dep qorytyndylady spıker.

Buǵan deıin jambyldyq polıtseılerge alǵashqy bolyp otandyq óndiriste jasalǵan elektromobılder tabys etilgeni habarlanǵan edi.