Jambyl polıtseıleri Ledı atty ıt týraly detektıv fılm túsirdi
TARAZ. KAZINFORM – 23 maýsym – Qazaqstan polıtsııasy kúni merekesine oraı, oblystyq polıtsııa departamentiniń bastamasymen «Ledı» atty fılm túsirildi. Fılmdegi oqıǵalar shynaıy oqıǵaǵa negizdelgen.
Jambyl oblystyq polıtsııa departamentiniń kınologııalyq qyzmeti ortalyǵynda Ledı degen laqap atpen belgili tórt jasar belgııalyq ovcharka tuqymdas ıt bar. Ol kishi ınspektor-kınolog Nurbol Tórebekke bekitilgen.
Ledı – qaýipti qylmyskerlerdi ustaýǵa mamandanǵan, shabýyldaýshy ıt. Ol sondaı-aq, jarylǵysh zattar men qurylǵylardy tabýǵa da arnaıy úıretilgen.
Departamenttiń baspasóz hatshysy Gúlsara Muhtarqulovanyń aıtýynsha, Jambyl oblysynyń PD Kınologııalyq qyzmeti ortalyǵynda bolǵan kezeńde Ledıdiń kómegimen tonaý, qaraqshylyq shabýyldar, kisi óltirý sekildi 80-nen astam qylmys ashylyp, qaýipti qylmyskerler quryqtalǵan.
– Kúmándi zattardy tabý boıynsha shaqyrtý túsken kezde birinshi kezekte ınspektor-kınolog ıtpen jáne saperlermen birge sol jerge barady. Máselen, 29 mamyrda polıtsııaǵa kóshege qaldyryp ketken ıesiz sómkelerdi tabý týraly 2 shaqyrtý tústi. Bizdiń Ledı eki jerge de bardy. Jarylǵysh qurylǵylardy tappaǵan ıt, polıtseıge belgi berdi. Olar sodan keıin ǵana sómkelerdi ashty,– deıdi Jambyl oblysynyń PD Kınologııalyq qyzmet ortalyǵynyń bastyǵy ıÝrıı Nalıvkın.
Ledı 2021 jyly Baızaq aýdanyndaǵy bolǵan jarylys kezinde de jarylǵysh zattardy izdeýge qatysqan. Osy jyldar ishinde ol ózin tek kásibı, senimdi serik retinde kórsetken.
Qylmyskerlerden qoryqpaıtyn qyzmettik ıt Kınologııalyq qyzmet ortalyǵynda jıi qonaq bolatyn, kanısterapııa qajet etetin erekshe balalarǵa meıirimdilik tanytady. ıÝrıı Nalıvkın Ledı balalarǵa arnalǵan qoıylymdarǵa da qatysady, shabýyldaý men izdeý daǵdylaryn kórsetýdi jaqsy kóretinin aıtady.
Jalpy, Jambyl oblysyndaǵy polıtseıler elimizde alǵashqylardyń biri bolyp qyzmettik ıtterge qarym-qatynas ádisterin arnaıy úıretip, balalarǵa «dáriger» retinde paıdalana bastaǵanyn atap ótken jón.
Zamanaýı tehnologııalardyń úzdiksiz damýyna qaramastan, zańsyz zattardy izdeýdegi, qylmyskerlerdi ustaýdaǵy jáne qylmystardy ashýdaǵy qyzmettik ıtterdiń róli kún saıyn artyp kele jatqanyn polıtseıler basa aıtýda.
