Jambyl óńirinde «Taza Qazaqstan» ekologııalyq aktsııasy jalǵasyp jatyr
TARAZ. KAZINFORM –– 773 myńnan astam oblys turǵyndary qatysqan kóktemde bastalǵan ekologııalyq aktsııa jyl saıyn dástúrli túrde qolǵa alynatyn kúzgi tazalyq aılyǵyna ulasty.
Oblys ortalyǵy Taraz qalasynda «Kúzgi tazalyq» eko aktsııasy sheńberinde «Seńkibaı» kanalynyń 5 shaqyrym jaǵalaýy qoqystardan tazartylyp, ekologııalyq aktsııaǵa qatysýshylar shashylyp jatqan plastık qaldyqtar men qoqystardy jınap, 200-den astam qap qoqysty arnaıy orynǵa aparyp tókti. Kanaldardy tazalaý jumystary qashanda aıryqsha mańyzǵa ıe. Bul jumystar óńirdiń shyraıyn ashyp qana qoımaı, sý tasqyny qateriniń aldyn alýǵa da septigin tıgizetini sózsiz.
«Mádenıettiligimizdi kórsetetin tazalyqtyń adamzat balasy úshin orny erekshe. «Senbilik – qalanyń sáýleti men sánin arttyratyn, tazalyǵy men tártibin túzeıtin erekshe úrdis. Týǵan jerimizdi, onyń ishinde qoǵamdyq jerlerde tazalyq saqtaý arqyly kópshiliktiń rızashylyǵyn alatynymyzdy esten shyǵarmaǵan jón. Ol úshin árbirimiz osy tazalyqtyń tóńireginde jaýapty ekenimizdi seziný ǵana jetkilikti. Sananyń tazalyǵy arqyly aınalanyń tazalyǵyna úles qosa alatynymyz anyq», - dedi senbilikke qatysýshy Aıat Asqarbekuly.
Kúzgi tazalyq aılyǵynyń bastalýyna baılanysty tazalyq jumystary oblystyń barlyq aýdandarynda ótkizildi. Atap aıtqanda, sý aıdyndarynyń jaǵalaýlarynda, saıabaqtar men skverlerde, kópqabatty turǵyn úılerdiń mańynda, demalýshylar kóp jınalatyn oryndarda jalǵasty.
Belsendi azamattar, eriktiler men jastar Baızaq aýdanynyń Sarykemer aýylyndaǵy A.Sýhanbaev atyndaǵy ortalyq saıabaqta, tarıhı-ólketaný murajaıynda, Qordaı aýdanynyń Kasyq jáne Jambyl aýyldyq okrýginiń avtomobıl jolynyń boıynda tazalaý jumystaryn júrgizse, Jýaly aýdanynyń rýhanı ortalyǵy bolyp sanalatyn Talapty aýylyndaǵy Sherhan Murtaza mýzeıinde 100-den astam adamnyń qatysýymen «Ónegeli urpaq» ekologııalyq aktsııasy uıymdastyryldy.
Sondaı-aq, Merki aýdanynyń Aspara, Aqermen, T.Rysqulov aýdanynyń Qulan aýyldyq okrýgterinde eńbek ardagerleri, tyl, jalǵyzbasty qarttardyń aýlalarynda sýarý, aryqtaryn tazalaý, ákteý, qorshaýlardy syrlaý jumystaryn jasap, kómek qoldaryn sozdy. Aktsııa Jańatas qalasynda adamdar kóp júretin temir jol vokzalynda, «Aqubulaq» demalys aımaǵy men kópqabatty turǵyn úılerdiń mańynda júrgizildi.
Búgingi kúnge aktsııa aıasynda 60 tarıhı-mádenı eskertkish, 143 saıabaq pen skver aýmaǵy, 818 shaqyrym kanaldar men aryq júıesi, 129 myń aýlalar men 4,5 myń shaqyrym kóshe joldary tazartyldy. 16 myń tonna qoqys shyǵaryldy. 60 myńǵa jýyq kóshet otyrǵyzyldy.
Bul jumystarǵa jalpy 958 birlik tehnıka qatysty.
