Jambyl oblysynyń jol saqshylary AvtoÝragandy durys paıdalanbaǵan

Jambyl oblysynyń prokýratýrasy «AvtoÝragan-MS» mobıldi keshenin tıimsiz paıdalaný faktilerin anyqtady, dep habarlaıdy Kazinform.

2022-2023 jyldary oblystyq Polıtsııa departamenti 15 mobıldi keshen satyp alǵan.

"Bul keshender jol qozǵalysy erejelerin buzýdyń 16 túrin anyqtaý úshin aýmaqtaǵy kólik quraldaryn avtomatty túrde fotobeınefıksatsııalaýdy júrgizýi tıis. Alaıda, is júzinde kórsetilgen keshen oblys aýmaǵynda buzýshylyqtyń tek 1 túrin (jyldamdyqty asyrýy) tirkeıdi.

Keshenniń tolyqqandy jumys isteýi úshin jol belgileriniń áreket etý aımaqtaryn kórsetetin elektrondyq karta qajet", - dep jazdy baqylaýshy organnan.

Al bul kemshilikter quqyq buzýshylyqtyń aldyn alý jáne oblys aýmaǵynda quqyqtyq tártipti qamtamasyz etý boıynsha qabyldanyp jatqan sharalarǵa da keri áserin tıgizedi.

Oblys prokýratýrasy tıisti shara qoldaný qajettigi týraly prokýrorlyq qadaǵalaý aktisin engizdi.