Jambyl oblysynyń veterınarııalyq pýnkt salý tájirıbesi respýblıkaǵa taralady
ASTANA. KAZINFORM – Jambyl oblysynda jańa tıptik úlgidegi 40 veterınarııalyq pýnkttiń qurylysy júrip jatyr. Onyń alǵashqysy Baızaq aýdanynda paıdalanýǵa berildi.
Ótken aptada Jambyl oblysyna jumys saparymen kelgen Parlament Májilisiniń Agrarlyq máseleler komıtetiniń tóraǵasy men músheleri, Sý resýrstary jáne ırrıgatsııa, Aýyl sharýashylyǵy mınıstrliginiń ókilderi, sondaı-aq respýblıkanyń basqa óńirleriniń veterınarlary atalǵan nysanmen jan-jaqty tanysty. Sondaı-aq delegatsııaǵa veterınarııa salasynda atqarylyp jatqan jumys jóninde baıandaldy.
Jalpy, óńirde 75 veterınarııalyq pýnkttiń qajettiligi anyqtalǵan. Osy máseleni sheshý maqsatynda bıyl emdeý alańdary bar, biryńǵaı jańa tıptik úlgidegi 40 veterınarııalyq pýnkttiń qurylysyn júrgizý josparlanǵan, onyń 20-sy memlekettik-jekemenshik áriptestik aıasynda salynyp jatyr.
2026 jyly 35 ǵımarat qurylysy júrgiziledi dep kútilip otyr.
Aýyl sharýashylyǵy vıtse-mınıstri Amanǵalı Berdalınniń aıtýynsha, Jambyl oblysy veterınarııa salasyna jańashyldyqtar engizý boıynsha óńirler arasynda kósh bastap tur. Ásiresi, veterınarııalyq pýnktter salý jobasy tıimdiligin kórsetip otyr.
Aıta ketý kerek, oblysta 2025 jyly veterınarııa salasyn damytýǵa 4,6 mlrd teńge bólindi, bul ótken jylmen salystyrǵanda 9 paıyzǵa artyq.
Salada 1 055 maman eńbek etedi, sońǵy eki jylda jumysshylardyń jalaqysy 30 paıyzǵa ósti.
Veterınarııalyq stantsııalarda 316 qyzmettik tehnıka bar. Bıyl oblystyq bıýdjet esebinen 50 jańa avtokólik satyp alyndy.
Budan bólek, veterınarlar 160 dana termosómkemen qamtamasyz etildi. 29 mln teńgege maýsymdyq qyzmettik kıim satyp alý kózdelip otyr.
Oblys aýmaǵynda 48 bıotermııalyq shuńqyr bar. Bıyl 25 shuńqyr qurylysyn júrgizý josparlanyp, 13-niń qurylysy qarqyn alǵan. Qalǵan 12 shuńqyrdyń jer telimi naqtylanyp jatyr.