Jambyl oblysynyń tańbasy jańarýy múmkin
ASTANA. KAZINFORM – Jambyl oblysynda óńirdiń tańbasyn jańartý máselesi kóterildi. Ázirge resmı konkýrs jarııalanǵan joq, turǵyndar oblystyń jańa nyshany qandaı bolýy kerektigi jóninde pikir bildirýge shaqyryldy, dep habarlaıdy agenttik tilshisi.
Oblystyq sáýlet jáne qala qurylysy basqarmasy Instagram paraqshasynda tıisti habarlama jarııalap, turǵyndardy talqylaýǵa qatysýǵa úndedi.
Alaıda ázirge óńir turǵyndary bul bastamany talqylaýǵa asa belsendi qatysyp jatqan joq. Al jergilikti bılik konkýrs qashan jarııalanatynyn naqtylaǵan joq.
Qoldanystaǵy zańnamaǵa sáıkes, jańa emblemany bekitý týraly túpkilikti sheshimdi oblystyq máslıhat depýtattary qabyldaıdy. Ákimdik jobany ázirleýge jaýapty bolsa, máslıhat ony bekitedi.
Jańa eltańbany qabyldaý úshin birneshe kezeńnen ótý qajet.
– Aldymen ákimdik jańa emblemany ázirleýge konkýrs jarııalaýy tıis. Konkýrs týraly aqparat ótinimderdi qabyldaý merzimi aıaqtalǵanǵa deıin keminde úsh aı buryn ákimdiktiń resmı saıtynda jarııalanýy kerek, – delingen qoldanystaǵy talaptarda.
Odan keıin usynylǵan jobalar turǵyndardyń talqylaýyna shyǵarylady. Nátıjeleri hattamamen rásimdelip, eń kóp daýys jınaǵan nusqalar rámizder jónindegi sarapshylardyń qaraýyna jiberiledi. Oń qorytyndy alǵan jobalar máslıhattyń bekitýine usynylady.
Emblema avtorlaryna birqatar talap qoıylady. Atap aıtqanda, Qazaqstannyń Memlekettik Týy men Eltańbasyn, dinı, rýlyq jáne taıpalyq belgilerdi paıdalanýǵa tyıym salynady. Jazýlar qazaq tilinde bolýy tıis. Sondaı-aq sýret biregeı bolyp, ózge avtorlardyń quqyqtaryn buzbaýy qajet.
Osyndaı rásim 2026 jyldyń tamyzynda Shyǵys Qazaqstan oblysynda ótti. Óńirlik máslıhat taýlar, orman, kún jáne tolqyndar beınelengen jańa logotıpti bekitti. Onda «ShYǴYS QAZAQSTAN OBLYSY» degen tolyq ataý da jazylǵan.
Al Almaty oblysynda jańa emblema jobasy 2025 jyldyń jazynda turǵyndarmen talqylanyp, 2026 jyldyń mamyrynda bekitildi. Onyń ortasyna Altyn adamnyń bas kıimi beınelenip, kompozıtsııa qanatty barystarmen, taýlarmen, Іle ózenimen, shańyraq jáne alma sýretterimen tolyqtyryldy.
