Jambyl oblysynyń Merki aýdanynda 2 ırrıgatsııalyq kanaldyń rekonstrýktsııasy aıaqtaldy
TARAZ. KAZINFORM – Jambyl oblysyndaǵy ırrıgatsııalyq kanaldar, drenajdyq júıeler men qurylysjaılardy rekonstrýktsııalaý jobasy aıasynda Merki aýdanynda jalpy uzyndyǵy 36,6 shaqyrym bolatyn APTP jáne «Maılybaı» sharýashylyqaralyq kanaldarynyń kúrdeli jóndeý jumystary tolyq aıaqtaldy. Bul týraly Sý resýrstary jáne ırrıgatsııa mınıstrligi habarlady.
Joba Eýropalyq qaıta qurý jáne damý bankiniń qoldaýymen iske asyrylyp jatyr. Qazirgi ýaqytta merdiger uıym barlyq qurylys-montaj jumysyn tolyq oryndady. Nysandardy paıdalanýǵa berý jáne qabyldaý úshin jobanyń avtory, tehnıkalyq qadaǵalaý qyzmeti men merdiger uıym ókilderiniń qatysýymen arnaıy komıssııa quryldy. Kanaldarǵa vızýaldy tekserý júrgizilip jatyr.
Sharýashylyqaralyq kanaldardy rekonstrýktsııalaý jumystary 2024 jyldyń qazan aıynda bastalǵan bolatyn. Búginde nysandarda 15 arnaıy tehnıka men 30 qyzmetker jumys istep jatyr.
– Jobanyń júzege asyrylýy Merki aýdanyndaǵy 2700 gektar sýarmaly jerge sý jetkizýdi jaqsartyp, Jambyl oblysynyń aýyl sharýashylyǵyn damytýǵa yqpal etedi. Sý tasymaldaý kezindegi paıdaly áser koeffıtsıenti 62%-dan 80%-ǵa deıin artyp, sý shyǵynyn aıtarlyqtaı azaıtady, - dedi Sý resýrstary jáne ırrıgatsııa vıtse-mınıstri Erbolat Ibraıhanov.
Eske salsaq, budan buryn habarlaǵanymyzdaı, Úlken Almaty kanalyn qaıta jańǵyrtýǵa qosymsha 400 mln teńge qajet.