Jambyl oblysynyń esirtki qylmysyna qarsy bólimshe bastyqtary qamaýǵa alyndy
ASTANA. KAZINFORM – Jambyl oblysy Polıtsııa departamentiniń esirtki qylmysyna qarsy is-qımyl jónindegi aýdanaralyq bólimine qarasty bólimshe bastyqtaryna qatysty alaıaqtyq faktisi boıynsha sotqa deıingi tergeý júrip jatyr. Bul týraly Sybaılas jemqorlyqqa qarsy is-qımyl agenttigi tóraǵasynyń kómekshisi, resmı ókil Danııar Bıgaıdarov málim etti.
«Jambyl oblysy boıynsha Sybaılas jemqorlyqqa qarsy qyzmet Jambyl oblysy Polıtsııa departamentiniń esirtki qylmysyna qarsy is-qımyl jónindegi aýdanaralyq bólimi bólimsheleriniń bastyqtaryna qatysty alaıaqtyq faktisi boıynsha sotqa deıingi tergeý júrgizýde. Olar Shý aýdanynyń turǵynynan esirtki zattaryn zańsyz saqtaǵany úshin qylmystyq jaýapkershilikke tartpaǵany úshin aldaý arqyly 1 550 000 teńge somasynda aqsha alý kúdigine ilindi», - dedi Danııar Bıgaıdarov agenttikte ótken baspasóz máslıhatynda.
Onyń aıtýynsha, atalǵan laýazymdy tulǵalar ustalyp, Taraz qalasynda ýaqytsha ustaý ızolıatoryna qamaldy. Tergeý amaldary jalǵasýda.
