Jambyl oblysynyń ekonomıkasyn kúsheıtý kerek, oǵan qajetti jaǵdaı da, múmkindik te bar - Prezıdent

TARAZ. KAZINFORM - Taraz – ejelgi órkenıettiń izi qalǵan jer. Shejireli shahardyń jurtymyz úshin orny erekshe, dedi Memleket basshysy Qasym-Jomart Toqaev Jambyl oblysy jurtshylyǵymen kezdesýi barysynda.

-Jambyl oblysynyń ahýaly ákim Erbol Qarashókeevtiń baıandamasyna qaraǵanda jaman emes. Biraq oblystyń aldynda mańyzdy, ózekti maqsattar tur. Bul maqsattardy tolyǵymen oryndaý – ákimniń jáne búkil qyzmetshilerdiń eń negizgi mindeti. 

Oblystyń ekonomıkasyn kúsheıtý kerek. Oǵan qajetti jaǵdaı da, múmkindik te bar. Belsendi jumys bastaldy. Jumystyń qarqynyn báseńdetýge bolmaıdy. 

Taraz – ultymyzdyń asqaq rýhy, baı mádenıeti, eldik muraty jáne erlik dástúri toǵysqan qala. Bul – ejelgi órkenıettiń izi qalǵan jer. Shejireli shahardyń jurtymyz úshin orny erekshe, - dedi Prezıdent.

Sondaı-aq ol Tarazdyń eki myń jyldyq tarıhyn maqtan etetinimizdi, áýlıeata jerinde memlekettigimizdiń tuǵyryn nyǵaıtqan talaı tarıhı oqıǵalar bolǵanyna toqtaldy. 

- Qazaq handyǵy osy aımaqta qurylǵan. Kóne qala toǵyz joldyń torabynda tur. Ejelgi Uly Jibek joly qart Qarataýdyń etegin basyp ótken. Áıgili kerýen joly jańa zamanda jańa qarqynmen damyp keledi. «Batys Eýropa – Batys Qytaı» kólik dálizi Jambyl jeri arqyly ótip jatyr. Sonyń arqasynda aımaqtyń strategııalyq mańyzy artyp keledi. Jambyl oblysy kún ótken saıyn órkendep keledi, - dedi Memleket basshysy.

Aıta keteıik, Memleket basshysy Jambyl oblysynda jumys saparymen júr. Prezıdent onda birqatar ónerkásiptik jáne áleýmettik nysandardy aralap kórdi.