Jambyl oblysynyń dárihanalaryna 2,7 mln teńge aıyppul salyndy
ASTANA. KAZINFORM – Jambyl oblysynda dárilik preparattardy retseptsiz satýǵa qatysty 16 ákimshilik is qozǵalyp, dárihanalarǵa jalpy somasy 2 mln 681 myń 500 teńge aıyppul salyndy, dep habarlaıdy Kazinform tilshisi.
Retseptpen bosatylatyn dáriler dárigerdiń tıisti taǵaıyndaýy boıynsha satylýy kerek. Alaıda Jambyl oblysynda qajetti retseptsiz dári-dármek berý derekteri anyqtalǵan.
2026 jyldyń alǵashqy jartyjyldyǵynda Medıtsınalyq jáne farmatsevtıkalyq baqylaý departamentine osyndaı faktiler boıynsha 16 materıal túsken. Olardyń árqaısysy ákimshilik is qozǵaýǵa negiz bolǵan.
– Aıyppuldardyń jalpy somasy 2 mln 681 myń 500 teńgeni qurady, – dep habarlady vedomstvo.
Mundaı zańbuzýshylyqtarmen birneshe organ birlesip jumys isteıdi. Quqyq qorǵaý organdary tıisti materıaldardy joldasa, beıindi departament olardy qarap, óz quzyreti aıasynda shara qabyldaıdy. Baqylaý medıtsınalyq uıymdardyń qyzmetin de, dárilik zattardyń aınalymyn da qamtıdy.
Buǵan deıin Medıtsınalyq jáne farmatsevtıkalyq baqylaý komıteti Qazaqstan dárihanalarynda dári baǵasyn negizsiz kóterý men preparattardy retseptsiz satýdy jıi kezdesetin zańbuzýshylyqtar dep ataǵan edi.
Aıta keteıik, Shymkentte farmatsevtıkalyq qyzmet salasynda 73 zań buzýshylyq anyqtaldy.
