Jambyl oblysynyń birneshe aýdanynda jaýyn-shashyn mólsheri qaýipti deńgeıden asty
ASTANA. KAZINFORM — Taraz ben oǵan jaqyn ornalasqan birneshe eldi mekende jaýyn-shashyn mólsheriniń qalypty normadan eki eseden astam túskeni tirkeldi, dep habarlaıdy Kazinform tilshisi.
Oblysta qar 10 aqpannan 11 aqpanǵa qaraǵan túni jaýa bastady. «Qazgıdromet» RMK aımaqtyq fılıalynyń málimetinshe, jeti mıllımetr nemese odan da kóp jaýyn-shashyn qaýipti, al 20 mıllımetrden asatyn jaýyn-shashyn óte kóp dep sanalady. Sońǵy eki kúnde osyndaı kórsetkish toǵyz eldi mekende tirkeldi.
11 aqpanda Tarazda 22 mm jaýyn-shashyn tústi. T. Rysqulov aýdanyndaǵy Qulan jáne Aqyrtóbe aýyldarynda tıisinshe 15 jáne 19 mm, Shý aýdanynyń Tóle bı jáne Shoqpar aýyldarynda árqaısysynda 14 mm, Qarataýda — 14 mm, Baızaq aýdanynyń Aqjar aýylynda 18 mm, al Qordaı aýdanyndaǵy Beriktas pen Otar aýyldarynda árqaısysynda 7 mm jaýyn-shashyn tústi.
Jaýyn-shashyn 12 aqpanda da jalǵasty. Túnde jáne tańerteń Tarazda 17 mm, Qulanda 12, Aqjarda 8 jáne Beriktasta 7 mm jaýyn-shashyn tústi. Eń kóp qar Aqyrtóbe aýylynda jaýdy, onda 24 mm jaýyn-shashyn tirkeldi.
Sınoptıkter boljamynsha, qar jaýý kúnniń sońyna deıin jalǵasady. 13 aqpanǵa qaraı jaýyn-shashyn azaıyp, qar jańbyrǵa ulasady. Demalys kúnderi kún jylynyp, kelesi aptada kúsheıetini boljandy.
Mamandardyń atap ótýinshe, jaýyn-shashynnyń mundaı mólsheri qaýipti meteorologııalyq qubylys bolyp sanalady. Qardyń kóp jaýýy joldyń kórinýin aıtarlyqtaı tómendetedi, jol-kólik oqıǵalarynyń qaýpin arttyrady, al ylǵaldy qar elektr jelileri, aǵashtar jáne shatyrlarǵa zaqym keltirýi múmkin. Turǵyndarǵa joldarda saqtyq tanytý jáne qolaısyz aýa raıy kezinde múmkindiginshe jolǵa shyqpaý usynyldy.
Jambyl oblystyq ákimdigi qolaısyz kún raıyna baılanysty kommýnaldyq qyzmetter joǵary daıyndyq rejımine aýystyrylǵanyn habarlady. Jergilikti joldardy kútip ustaý úshin 21 merdiger uıym jáne 178 tehnıka jumyldyryldy, 14 925 tonna qum jáne 1500 tonna tuz daıyndaldy. Oblystyq mańyzy bar joldarda 11 merdiger jáne 85 tehnıka, al aýdandyq joldarda 10 merdiger jáne 93 kólik jumys istep jatyr.
Tarazda qar tazalaý jumystaryna «Jasyl El-Taraz» JShS-niń 50 tehnıkasy men 300-den astam jumysshysy tartyldy, qorda 2600 tekshe metr qum jáne 1530 tonna tuz bar. Ákimdik qajet bolǵan jaǵdaıda qosymsha qurylys tehnıkasyn jumyldyrýǵa ýáde berdi.
Buǵan deıin Jambyl oblysynda qutqarýshylar 80 kólikti qar qursaýynan shyǵarǵanyn jazdyq.
