Jambyl oblysynyń bir aýdanynda Sibir jarasynyń 27 oshaǵy saqtalǵan
ASTANA. KAZINFORM — Barlyq qorym baqylaýda bolyp, veterınarlyq talaptarǵa saı bolǵanyna qaramastan, olardyń bolýy áleýetti qaýip faktory retinde qalyp otyr, dep habarlaıdy Kazinform agenttiginiń tilshisi.
Jambyl oblysynyń veterınarlyq qyzmetiniń málimetinshe, qorymdar qorshalyp, betondalǵan.
Arnaıy taqtaıshalarda aýrý tirkelgen kún, janýar túri jáne ornalasqan jerdiń koordınattary kórsetilgen.
Belgilengen aýmaqtarda turaqty túrde zalalsyzdandyrý jumystary júrgiziledi.
Jalpy Turar Rysqulov aýdanynda Sibir jarasynyń 27 oshaǵy anyqtalǵan. Olardyń barlyǵy aýdannyń 12 eldi mekeninde ornalasqan.
Sibir jarasy — asa qaýipti juqpaly aýrýlardyń biri. Ol adamǵa aýrý juqtyrǵan janýarlarmen nemese topyraqpen baılanys kezinde juǵýy múmkin. Sondyqtan mundaı aýmaqtar qatań esepke alynyp, sanıtarlyq baqylaýda bolady.
Mamandardyń aıtýynsha, mundaı oshaqtar «statsıonarlyq qolaısyz aýmaqtar» sanatyna jatady, ıaǵnı, bul jerlerde buryn asa qaýipti aýrý tirkelgen. Sondyqtan ınfektsııanyń taralý qaýpin boldyrmaý úshin turaqty baqylaý qajet.
Eske salaıyq, jaqynda Shymkent qalasynda Sibir jarasy dıagnozy resmı túrde rastalǵan bolatyn.
Sondaı-aq, Sibir jarasynyń órshýine baılanysty Aqmola oblysynyń bas veterınary jazalanǵany belgili boldy.
