Jambyl oblysynyń bas onkologine 12 mln teńge aıyppul salyndy

TARAZ. KAZINFORM — Bul sot úkimin jeńil dep sanaýǵa bolady, óıtkeni prokýror sottalýshyny 3,5 jylǵa bas bostandyǵynan aıyrýdy suraǵan.

Jambyl oblystyq kópsalaly onkologııa jáne hırýrgııa ortalyǵynyń bas dárigeri Aıbaz Álıhanovqa Taraz qalasynyń turǵynyn medbıke retinde jumysqa ornalastyrýǵa kómekteskeni úshin 400 myń teńge para alǵany úshin aıyp taǵyldy. Aqsha aýdarymy eki jylǵa jýyq ýaqyt buryn bolǵan, eger ol áıelge paranyń bir bóligin qaıtarmaǵanynda, ustalmaýy da múmkin edi.

2023 jyldyń mamyr aıynda áıel bas dárigerge ózin ortalyqqa medbıke retinde jumysqa alý týraly ótinishpen júgingen. Dáriger ótinishten bas tartpaǵaı, Gollıvýd kınosyndaǵydaı qaǵazǵa qajetti somany jazyp, áıelge ustatqan. Áıel óz anasynan qajetti qarajatty qaryzǵa alyp, kelesi kúni bas dárigerdiń kabınetine konvertpen oralǵan. Álıhanov ýádesinde turyp, oǵan jumys taýyp berdi. Alaıda, medbıke ujymǵa syımaı, bir jarym jyl jumys istegennen keıin óz erkimen jumystan ketý týraly aryz jazǵan.

Osydan keıin boıjetken sybaılas jemqorlyqqa qarsy qyzmetke barǵan. Qarasha aıynyń sońy men jeltoqsan aıynyń basynda ol barlyq qajetti dybys jazý qurylǵylarmen jabdyqtalyp, bergen parasynyń bir bóligin bolsa da qaıtaryp berýdi ótinip bas dárigerdiń qabyldaýyna qaıta kelgen. Álıhanov alǵan somanyń jartysyn qaıtarýǵa bolady dep sheshti. Dál osy kezdesý barysynda bolǵan áńgime aldaǵy is boıynsha aıyptaýdyń negizgi aıǵaǵy bolmaq.

Aıbaz Álıhanov óz kinásin birden moıyndap, tergeýmen yntymaqtasa bastady, sonyń arqasynda sot protsesi jedeldetilgen túrde ótti. Bir aıdan keıin ol № 2 qalalyq sottyń ǵımaratynda boldy.

Prokýror dárigerdiń atqarǵan qyzmeti men qoǵamdaǵy mártebesin eskere otyryp, ol basqalarǵa sabaq bolýy kerek dep eseptedi. Aıyptaýshy tarap bul azamatty memlekettik qyzmette jumys isteýge tyıym salyp, 3,5 jylǵa bas bostandyǵynan aıyrýdy surady.

Óz kezeginde Álıhanovtyń advokaty sot otyrysynda aıyptylyq máselesi áli talqylanbaǵanyn, sottalýshy óz kinásin tolyq moıyndaǵanyn atap ótti.

Jedeldetilgen sot protsesi 2025 jyldyń 16 qańtarynda aıaqtaldy. Sýdıa dárigerdi aıypty dep tanyp, Aıbaz Álıhanov 400 myń teńge para alǵany úshin 12 mıllıon teńge aıyppul tóleýi kerek dep sheshti. 200 myń teńge memleket paıdasyna tárkilenedi.

Sot úkimine sáıkes, Aıbaz Álıhanovqa ómir boıyna basshylyq qyzmet atqarýǵa tyıym salyndy, biraq ol dáriger qyzmetin jalǵastyra alady.

Ortalyqtyń bas dárigerine para bergen is boıynsha ekinshi aıyptalýshy jazalanbaıdy, óıtkeni para bergen azamat ózine qatysty bopsalaý oryn alsa nemese ol óz erkimen quqyq qorǵaý nemese arnaıy organǵa habarlaǵan bolsa, qylmystyq jaýaptylyqtan bosatylady.

Buǵan deıin Jambyl oblysynyń bas onkologi para alǵany úshin sottalyp jatqany habarlanǵan bolatyn.

Eske sala keteık, buǵan deıin Jambyl oblysynyń JQTB ortalyǵyna merzimi ótken preparattardy qoldanǵan degen kúdik keltirilgen bolatyn.