Jambyl oblysynyń áleýmettik ınfraqurylymyn damytýǵa 20 mlrd teńgeden astam qarajat baǵyttaldy
TARAZ. KAZINFORM - Jambyl oblysynda memlekette qaıtarylǵan aktıvter esebinen qarjylandyrylatyn áleýmettik mańyzy bar nysandardyń qurylysy júrip jatyr, dep habarlaıdy Jambyl oblystyq prokýratýrasynyń baspasóz qyzmeti.
Arnaıy memlekettik qordan oblystyń densaýlyq saqtaý jáne sýmen jabdyqtaý júıesin damytýǵa 20 mlrd teńgeden astam qarajat bólindi.
Búginde kópten kútken Qordaı, Talas jáne Merki aýdandarynda 2 jańa dárigerlik ambýlatorııa salynyp, 1 aýrýhana kúrdeli jóndeýden ótip, halyq ıgiligine berildi.
Sonyń nátıjesinde 85 myńnan astam turǵyn, onyń ishinde shalǵaı aýyldardaǵy 5 myńǵa jýyq adam sapaly medıtsınalyq kómek alyp otyr.
Mysaly, ótken jyly Qordaı aýdanyndaǵy Úlken Sulýtór, Sulýtór jáne Kóktóbe aýyldaryna jańa dárigerlik ambýlatorııa ashyldy.
Buǵan deıin turǵyndar 1960 jyly salynǵan eski ǵımaratta em qabyldap kelgen.
Qysta qatynaýy qıyn bul aýyldardyń 3 myńǵa jýyq turǵyn endi aýdan ortalyǵyna barmaı-aq, zamanaýı medıtsınalyq qyzmet alyp otyr.
Sonymen qatar oblysta 15 aýyz sý nysanynyń qurylysy aıaqtalyp, Taraz qalasy men 7 aýdannyń 28 myń turǵyny (Jambyl, Baızaq, Talas, Shý, T.Rysqulov, Moıynqum, Qordaı aýdandary) sapaly aýyz sýmen qamtamasyz etildi.
Byltyr Talas aýdanyndaǵy Qaraoı aýylynda 90 jyl boıy bolmaǵan aýyz sý qubyry tartyldy.
Qazirgi tańda taǵy 8 aýyz sý jobasy men 2 medıtsınalyq nysannyń qurylysy jalǵasyp jatyr.
Sonyń biri – Qarasaı batyr aýylyndaǵy jańa aýyz sý júıesi.
Jobanyń jalpy quny shamamen 2,5 mlrd teńge bolsa, onyń 1,9 mlrd teńgesi Arnaýly memlekettik qordan bólindi.
Joba aıaqtalǵan soń aýyldyń 2,5 myńǵa jýyq turǵyny sapaly ári turaqty aýyz sýmen qamtylady.
Barlyq nysandardyń qurylysy men bólingen qarajattyń tıimdi jumsalýy oblys prokýratýrasynyń turaqty baqylaýynda.
Qaıtarylǵan aktıvterdiń arqasynda Almatynyń 2500-den astam turǵyny aýyzsýǵa qol jetkizdi.
