Jambyl oblysynyń 3 aýdanynda quqyqtyq tártipti kúsheıtý tapsyryldy

ASTANA. KAZINFORM – Shý aýdanynda oblys prokýrory Nurǵalym Ábdirovtyń tóraǵalyǵymen ótken kóshpeli mekemearalyq májiliste Moıynqum, Shý jáne Qordaı aýdandaryndaǵy quqyqtyq tártip pen qylmystyq ahýaldyń jaı-kúıi saralanyp, jastar arasyndaǵy toptyq buzaqylyq pen uıymdasqan qylmystarǵa qarsy is-qımyl máseleleri qaraldy.

Májiliste Moıynqum aýdanynda keıbir qylmys túrleri azaıǵanymen, profılaktıkalyq sharalardyń álsireýine polıtsııa qyzmetkerleriniń jetispeýshiligi, adam kóp shoǵyrlanatyn oryndarda beınebaqylaý kameralarynyń bolmaýy jáne ózge de faktorlar sebep bolyp otyrǵany aıtyldy.

Osyǵan baılanysty polıtsııa qyzmetine jedel quramdy kúsheıtý, ýchaskelik ınspektorlardyń jumysyn jetildirý jáne shalǵaı aýyldarda aldyn alý sharalaryn jandandyrý tapsyryldy. Jergilikti atqarýshy organdarǵa beınebaqylaý júıelerin ornatý usynyldy.

Sondaı-aq májilis barysynda kóleńkeli ekonomıkamen kúres jáne jer qoınaýyn zańsyz paıdalaný faktilerine erekshe nazar aýdaryldy. Atap aıtqanda, 2025 jyldyń mamyr aıynda oblys prokýratýrasynyń úılestirýimen «Aqbaqaı» ken ornynda uıymdasqan qylmystyq toptyń zańsyz áreketi áshkerelenip, kúdiktiler ustaldy. Qazirgi tańda sotqa deıingi tergeý amaldary júrgizilýde.

Oblys prokýrory quqyq qorǵaý jáne ýákiletti memlekettik organdar basshylaryna ózara is-qımyldy kúsheıtip, zańsyz áreketterge jedel den qoıýdy, jedel aqparat almasý men profılaktıkalyq sharalardy júıeli túrde júrgizýdi tapsyrdy.

Mekemearalyq jumys toby quqyq buzýshylyqtarǵa yqpal etetin sebepter men jaǵdaılardy tereń taldady. Nátıjesinde profılaktıkalyq jáne jedel jumys júrgizýdegi kemshilikter anyqtalyp, olardy joıýǵa jáne birlesken árekettiń tıimdiligin arttyrýǵa baǵyttalǵan usynystar ázirlendi.

Anyqtalǵan zań buzýshylyqtar boıynsha oblys prokýratýrasy tıisti qadaǵalaý aktilerin engizdi.

Aıta keteıik, Jambyl oblysynda úsh kúnde 280-ge jýyq jasóspirim polıtsııaǵa jetkizildi.