Jambyl oblysyndaǵy sý qoımalarynda halyqty eskertý júıesi ornatylady
ASTANA. KAZINFORM – Jambyl oblysy ákimdiginde aımaq basshysy Erbol Qarashókeevtiń tóraǵalyǵymen ótken otyrysta sý tasqyny kezeńine daıyndyq jáne sý tasqynynyń aldyn alý jáne joıý boıynsha praktıkalyq sharalardyń barysy talqylandy.
«Tolassyz jaýǵan jańbyr sý basý yqtımaldyǵyn arttyrdy. Sý tasqynyna qarsy sharalardy der kezinde júrgizý qajet. Basty mindet – turǵyndardyń qaýipsizdigin qamtamasyz etý, jiberilgen qatelikter boıynsha jumys isteý jáne ótken jyldyń jeltoqsan aıyndaǵy qıyn jaǵdaıdyń aldyn alý, bekitilgen algorıtm boıynsha naqty ári úılesimdi jumys isteý. Biz kez kelgen jaǵdaıǵa daıyn bolýymyz kerek. Qandaı da bir máseleler týyndasa, ony ashyq aıtyp, sheshý joldaryn qarastyrǵan jón», - dedi E.Qarashókeev.
Tótenshe jaǵdaılar departamenti bastyǵynyń orynbasary Rýslan Orynbekovtiń aıtýynsha, 34 eldi mekendi sý basý qaýpi joıylyp, ekeýiniń qaýpi barynsha azaıtylǵan.
«Sý tasqyny jaǵdaıynyń yqtımal asqynýyna den qoıý úshin 1459 adamnan turatyn avarııalyq-qutqarý bólimsheleriniń kúshteri men quraldarynyń toby quryldy, oǵan 364 arnaıy tehnıka jiberildi. 396 qabyldaý pýnkti, 6900 tonna ınertti materıal, 16140 tonna janar-jaǵarmaı daıyndaldy. «Qazgıdromet» RMK oblystyq fılıalynyń boljamdy málimetterin eskere otyryp, sý tasqyny kezeńine daıyndyq saraptalatyn bolady. Oblys boıynsha barlyǵy 1739 shaqyrym kanal, 1794 shaqyrym aryq, 428 shaqyrym jerasty arnalar júıesi, 946 sý ótkizý qubyry tazartyldy», - dedi R.Orynbekov.
Tabıǵı resýrstar jáne tabıǵatty paıdalanýdy retteý basqarmasynyń basshysy Oljas Baqqaraev sý qoımalarynyń tasqyn sýyn qabyldaýǵa jáne jınaýǵa daıyndyǵy týraly baıandady. Aımaq basshysy barlyq aýdandardaǵy sý qoımalaryna halyqty eskertý júıesin ornatýdy, Tasótkel sý qoımasyn qalpyna keltirý, Talas ózenindegi jaǵalaýdy bekitý jumystaryn baqylaýdy tapsyrdy.
«Sý basý qaýpi bar aımaqtarda tehnıkanyń daıyndyǵyn tekserip, mobıldi toptardy jasaqtap, kúshter men quraldardyń qosymsha rezervtik toptaryn daıyndaý qajet», - dedi E.Qarashókeev.
Buryn habarlanǵandaı, Jambyl oblysynda barlyq aýdandardyń 42 eldi mekeninde, sonymen birge Taraz qalasyndaǵy Tekturmas turǵyn alabynda sý tasqyny kezeńinde sý basý qaýpi bar.
