Jambyl oblysyndaǵy sarbaz ólimi: rota komandıri sot aldynda jaýap beredi
TARAZ.KAZINFORM - Bas prokýratýra Jambyl oblysyndaǵy Gvardeısk garnızony áskerı bóliminde sarbazdyń ólimine qatysty qylmystyq tergeý aıaqtalǵanyn habarlady.
- Osy jylǵy 27 qańtarda sarbaz E. Rýstemulynyń qaza bolý sebepteriniń biri bolǵan Gvardeısk garnızonyndaǵy áskerı bólim rota komandıriniń qyzmetke salǵyrt qaraýy boıynsha qylmystyq isti tergeý aıaqtaldy. Tergeý barysynda laýazymdy tulǵanyń jeke quramnyń qyzmetin jáne áskerı qyzmetshilerdiń qarýdy qoldanýyn baqylamaǵany, sonymen qatar qaza bolǵan sarbazdyń qyzmettesterine qatysty bılik ókilettigin asyra paıdalanǵany anyqtaldy, - delingen habarlamada.
Bas prokýratýra qysqa merzim ishinde qajetti dálelder jınalyp, qylmystyq is sotqa qaraý úshin joldanǵanyn málimdedi.
Sarbazdyń ólimine qatysty basqa da mán-jaılardy tergeý is-sharalary jalǵasyp jatyr, tergeý barysy Bas áskerı prokýratýranyń erekshe baqylaýynda.
Qylmystyq-protsestik kodekstiń 201-baby boıynsha, aldyn ala tergeý derekteriniń basqa málimetteri jarııalaýǵa jatpaıdy.
Buǵan deıin Jambyl oblysynda qaraýyl bastyǵy oq tıip, kóz jumǵanyn jazǵan edik.
