Jambyl oblysyndaǵy respýblıkalyq joldar boıyna 11 baılanys munarasy salynady
ASTANA. KAZINFORM — Jambyl oblysynda respýblıkalyq mańyzy bar avtojoldardyń boıyna 11 antenna ornatylady. Bul uıaly baılanys sapasyn jaqsartyp, júrgizýshilerdiń tótenshe jaǵdaıda jedel kómek suraýyna múmkindik beredi.
Óńir bıligi respýblıkalyq trassalar boıyndaǵy uıaly baılanys jelisin kezeń-kezeńimen damytýdy josparlap otyr.
Turaqty baılanys júrgizýshilerge baǵyt-baǵdar alýǵa jáne baılanysta bolýǵa, jol-kólik oqıǵasy, kólik buzylýy nemese ózge de tótenshe jaǵdaı kezinde jedel qyzmetterdi der kezinde shaqyrýǵa múmkindik beredi.
Jambyl oblysy ákimdigi tsıfrlandyrý jáne arhıvter basqarmasynyń málimetinshe, bıyl «Qoljetimdi ınternet» ulttyq jobasy aıasynda Shaqpaqata – Otar avtojoly boıynda jeti antenna qoıylady.
Uzyndyǵy 449,8 shaqyrym bolatyn bul jol ýchaskesi Túrkistan oblysymen shekaradan bastalyp, Almaty oblysyna deıin sozylady.
Budan bólek, Moıynqum aýdanyndaǵy Hantaý – Aqsúıek jáne Býrylbaıtal – Qashqanteńiz avtojoldarynyń boıynda taǵy tórt baılanys nysany boı kóteredi.
Bul joldardaǵy kólik aǵyny salystyrmaly túrde az bolǵanymen, halyq sırek qonystanǵan shóleıt aýmaq arqyly ótedi. Sondyqtan munda uıaly baılanystyń turaqty bolýy tótenshe jaǵdaı kezinde erekshe mańyzdy.
Barlyq joba boıynsha jobalyq-smetalyq qujattama memlekettik saraptamadan oń qorytyndy alǵan.
Qurylys-montaj jumystary bıylǵy jyldyń sońyna deıin bastalady. Nysandar paıdalanýǵa berilgennen keıin qazir baılanys turaqsyz nemese múlde joq jol ýchaskelerinde uıaly baılanys sapasy jaqsarady.
Buǵan deıin Shalǵaıdaǵy aýdandarǵa uıaly baılanys qashan qosylatyny týraly jazdyq.
