Jambyl oblysyndaǵy orman qorynyń jeri kómir óndirýge beriledi

ASTANA.KAZINFORM - QR Úkimetiniń qaýlysymen Kókterek orman jáne janýarlar dúnıesin qorǵaý mekemesine tıesili 165 gektar jer kómir óndirý úshin «Qulan-Kómir» JShS-ne berildi, dep habarlaıdy Kazinform tilshisi.

2025 jyldyń 28 qazanyndaǵy №901 qaýlyǵa sáıkes, Moıynqum aýdanyndaǵy bul ýchaskeler orman alqaptarynan ónerkásip, kólik jáne baılanys jerlerine, sondaı-aq basqa da aýyl sharýashylyǵy emes maqsattarǵa qaıta jikteldi.

Jambyl oblysynyń ákimine belgilengen tártipke sáıkes kómir óndirý jumystaryn júrgizý úshin seriktestikke osy ýchaskelerdi bólýdi qamtamasyz etý tapsyryldy. Sonymen qatar, kompanııa orman sharýashylyǵyna qatysy joq jerlerdi tartyp alýdan týyndaǵan orman sharýashylyǵy shyǵyndaryn respýblıkalyq bıýdjetke óteýge mindetti.

Qujattyń qosymshasyna sáıkes, jalpy 165 gektar aýmaqtyń 134,5 gektary jaıylymdar, al 30,5 gektary basqa jerler. Aýmaqta orman joq.

Buǵan deıin «Qulan-Kómir» JShS resmı ótinishinde 181 gektar jerdi bólýdi suraǵan bolatyn, onyń ishinde 17,5 gektary shahta jumystaryna jáne 163,5 gektary ınfraqurylymǵa — kómir qoımasyna, qaldyq úıindilerine, turǵyn úı keshenine, joldarǵa jáne basqa da óndiristik nysandarǵa arnalady.

Qaýly qol qoıylǵan kúnnen bastap kúshine enedi jáne ony Qazaqstan Respýblıkasynyń Premer-Mınıstri Oljas Bektenov bekitti.

Energetıka mınıstrligi buǵan deıin Qazaqstanda kómirmen jabdyqtaýda eshqandaı problema joq ekenin málimdegen bolatyn.