Jambyl oblysyndaǵy kisi ólimi: marqumnyń týystaryn ne alańdatyp otyr
ASTANA. KAZINFORM – Jambyl oblysynda oqqa ushqan azamattyń týystary kúdiktiniń jaýapkershilikten jaltarýy múmkin dep alańdaıdy. Olar áleýmettik jeli arqyly Qazaqstan Prezıdenti Qasym-Jomart Toqaevqa úndeý jasap, isti jeke baqylaýyna alýdy surady.
Marqumnyń jaqyndarynyń aıtýynsha, 1 tamyzǵa qaraǵan túni saǵat shamamen 03:00-de T. Rysqulov aýdanyndaǵy Lýgovoe aýylynyń Pýshkın kóshesinde Ahmet Dúkenbaıǵa oq atylyp, ol qaza tapqan.
Týystary bul qylmysqa aýdan aýmaǵynda áreket etedi dep sanaıtyn uıymdasqan toptyń músheleri qatysy bolýy múmkin ekenin alǵa tartady. Olardyń sózinshe, qaıǵyly oqıǵaǵa deıin atalǵan adamdar Ahmet Dúkenbaıǵa birneshe ret qoqan-loqy jasap, qysym kórsetken. Alaıda polıtsııa bul aqparatty resmı túrde rastaǵan joq.
Marqumnyń otbasy men áleýmettik jeli qoldanýshylary Prezıdent Qasym-Jomart Toqaevtan tergeýdi jeke baqylaýyna alýdy, aıtylǵan qaýip-qaterlerdiń mán-jaıyn tekserýdi jáne qylmysqa qatysy bolýy múmkin barlyq tulǵany anyqtaýdy surady.
Úndeýde marqumnyń jaqyndary osy ýaqytqa deıin oqıǵanyń barlyq mán-jaıy tolyq túsindirilmegenin aıtqan. Olar kináliler jazadan qutylyp ketýi múmkin dep qaýiptenedi.
Ahmet Dúkenbaıdyń artynda jubaıy, kámeletke tolmaǵan balalary jáne jalǵyz ulynan aıyrylǵan qart ata-anasy qaldy.
Jambyl oblysy polıtsııa departamenti atalǵan derek boıynsha Qazaqstan Respýblıkasy Qylmystyq kodeksiniń 99-baby («Adam óltirý») boıynsha sotqa deıingi tergep-tekserý bastalǵanyn habarlady.
– Polıtsııa qyzmetkerleri kúdiktiniń kim ekenin anyqtap, ony ýaqytsha ustaý ızolıatoryna qamady. Qazir qylmystyq isti jan-jaqty, tolyq ári obektıvti tergeýge baǵyttalǵan qajetti tergeý áreketteri júrgizilip jatyr, – dep málimdedi vedomstvo.
Polıtsııa Qylmystyq-protsestik kodekstiń 201-babyna sáıkes ózge málimetter jarııa etilmeıtinin atap ótti.
Eske salaıyq, buǵan deıin Jambyl oblysynda 8 jyl buryn bolǵan qaraqshylyq qylmys ashylǵany týraly jazdyq.
