Jambyl oblysyndaǵy fosfor zaýytynan aq tútin kóterildi: ne belgili boldy

ASTANA. KAZINFORM – Áleýmettik jelilerde Jambyl oblysyndaǵy Jańa Jambyl fosfor zaýyty (NDFZ) mańynda túsirilgen beınejazba tarady. Kadrlarda kásiporyn aýmaǵynan aq tútin kóterilgeni baıqalady.

Jeli qoldanýshylarynyń aıtýynsha, zaýyttyń №7 tsehynda jarylys bolǵan bolýy múmkin.

Alaıda kásiporynnyń resmı aqparatyna qaraǵanda, bul jaǵdaı sary fosfordy saqtaý qoımasynda oryn alǵan. Shıkizatty tasymaldaýǵa arnalǵan ydysqa quıý kezinde fosfor azdap tógilgen.

«Fosfor aýamen árekettesken sátte qysqa ýaqyttyq janý oryn aldy.

Órt zaýyt qyzmetkerleriniń kúshimen dereý sóndirildi, zardap shekkender joq. Oqıǵa ornyna tótenshe jaǵdaılar departamentiniń mamandary kelip, mán-jaıyn anyqtap jatyr», — dep habarlady Jambyl oblysy TJD.

Málimetter ekologııa departamentine jáne ózge de quzyrly organdarǵa tekseris júrgizý úshin berildi.

Qutqarýshylardyń aıtýynsha, turǵyndar úshin eshqandaı qaýip joq.

Aıta keteıik, budan eki jyl buryn osy zaýytta jarylys bolyp, eki adam zardap shekken edi. Sol kezde oqıǵaǵa baılanysty qylmystyq is qozǵalyp, aldyn ala sebep retinde qaýipsizdik erejelerin saqtamaý kórsetilgen bolatyn.