Jambyl oblysyndaǵy bólshek saýdanyń 70%-ǵa jýyǵy Tarazǵa tıesili

Ulttyq statıstıka bıýrosynyń oblystyq departamentiniń málimetinshe, 2026 jylǵy qańtar–qyrkúıek aılarynda óńirdegi bólshek saýda kólemi 473 mlrd teńgeni qurady. Baǵa ózgerisin eskergende, saýda kólemi ótken jyldyń sáıkes kezeńimen salystyrǵanda 2,3%-ǵa ósken.

Bul rette departament basshysynyń orynbasary Gúlmıra Imanbaeva jeke kásipkerlerdiń saýda aınalymy 14,4%-ǵa tómendegenin habarlady. Naryq qurylymyn tolyǵyraq Qazaqstan Respýblıkasy Strategııalyq josparlaý jáne reformalar agenttigi Ulttyq statıstıka bıýrosy jarııalaǵan basqa derekterden kórýge bolady. Osy jarııalanymǵa sáıkes, saýda kásiporyndary men uıymdary 298,3 mlrd teńgeniń taýaryn satqan. Bul oblystaǵy bólshek saýdanyń 63,1%-yn quraıdy. Bazarlarda saýda jasaıtyndardy qosa alǵanda, jeke kásipkerlerdiń úlesine 174,7 mlrd teńge nemese jalpy kólemniń 36,9%-y tıesili.

Osy kestede saýda kóleminiń aýmaqtar boıynsha bólinisi de kórsetilgen. Jarııalanǵan málimetter negizinde eseptegende, Taraz qalasynyń úlesi 69,1%-dy quraıdy. On aýdannyń arasynda saýda kólemi boıynsha Qordaı aýdany kósh bastap tur. Odan keıin Shý aýdany ornalasqan. Eń az saýda aınalymy Sarysý aýdanynda tirkelgen.

2026 jyldyń toǵyz aıyndaǵy saýda kólemi jáne onyń 2025 jyldyń sáıkes kezeńimen salystyrǵandaǵy ózgerisi tómendegideı:

• Taraz qalasy — 327 mlrd teńge, ósim 1,6%;

• Qordaı aýdany — 40,4 mlrd teńge, ósim 5%;

• Shý aýdany — 22,3 mlrd teńge, tómendeý 4,6%;

• Baızaq aýdany — 19,4 mlrd teńge, ósim 7,7%;

• Merki aýdany — 18,9 mlrd teńge, ósim 5,7%;

• Jambyl aýdany — 18 mlrd teńge, ósim 4,8%;

• Turar Rysqulov aýdany — 7,1 mlrd teńge, ósim 0,5%;

• Moıynqum aýdany — 6,9 mlrd teńge, ósim 25,6%;

• Jýaly aýdany — 4,7 mlrd teńge, ósim 4%;

• Talas aýdany — 4,6 mlrd teńge, ósim 0,8%;

• Sarysý aýdany — 3,6 mlrd teńge, tómendeý 6,8%.

Segiz aýdanda bólshek saýda kólemi artsa, eki aýdanda tómendegen. Bul rette saýda aınalymynyń joǵary bolýy onyń ósý qarqyny da joǵary degendi bildirmeıdi. Máselen, Shý aýdany aýdandar arasyndaǵy saýda kólemi boıynsha ekinshi orynda turǵanymen, onyń kórsetkishi edáýir tómendegen. Al Moıynqum aýdany saýda naryǵynyń kólemi jaǵynan kóshbasshylardan edáýir artta qalǵanymen, ósý qarqyny boıynsha basqa aýmaqtardan ozyp tur.

Ulttyq statıstıka bıýrosynyń taýar túrleri boıynsha derekterine sáıkes, oblystaǵy bólshek saýdanyń ósýine azyq-túlikke jatpaıtyn taýarlar saýdasy yqpal etken. Bul sanattaǵy taýarlardyń satylymy 3,8%-ǵa ósken. Al azyq-túlik ónimderiniń saýda kólemi ótken jyldyń qańtar–qyrkúıek aılaryndaǵy deńgeıde qalǵan.

Aqshalaı mánde azyq-túlikke jatpaıtyn taýarlardyń úlesine 293,7 mlrd teńge nemese naryqtyń 62,1%-y tıesili. Azyq-túlik ónimderi 179,3 mlrd teńgege satylǵan. Bul jalpy saýda kóleminiń 37,9%-yn quraıdy.

Taýar túrleri boıynsha bólinis saýda kólemi tómendegen eki aýdanda qaı sanattaǵy taýarlar satylymy azaıǵanyn kórsetedi. Sarysý aýdanynda azyq-túlik ónimderiniń satylymy 41,7%-ǵa qysqarǵan. Al azyq-túlikke jatpaıtyn taýarlardyń saýdasy 4,1%-ǵa ǵana ósken. Shý aýdanynda kerisinshe, azyq-túlikke jatpaıtyn taýarlardyń satylymy 7,6%-ǵa tómendese, azyq-túlik ónimderiniń saýdasy 2,5%-ǵa artqan.

Ulttyq statıstıka bıýrosy aýyldyq jerlerdegi saýdany da bólek kórsetedi. Munda bólshek saýda aınalymy 119,3 mlrd teńgeni quraǵan. Aýyldardaǵy saýdanyń 83,8%-yn saýda kásiporyndary men uıymdary qamtamasyz etken. Jeke kásipkerlerdiń úlesi 16,2% bolǵan.

Buǵan deıin Jambyl oblysynyń tańbasy jańarýy múmkin ekenin jazǵanbyz.