Jambyl oblysyndaǵy bóbekjaıda 10 bala ınfektsııa juqtyryp, aýrýhanaǵa tústi
TARAZ. KAZINFORM – Jambyl oblysy ákimdigi Merki aýdany «Nuraı» bóbekjaı baqshasynda bolǵan jaǵdaı týraly málimdeme jasady.
Bıyl 17 naýryz kúni Merki aýdandyq ortalyq aýrýhanasynyń juqpaly aýrýlar bólimine Merki aýyly Oıtal ýchaskesi «Nuraı» bóbekjaı baqshasynyń 10 tárbıelenýshisi kelip túsken.
Onyń ishinde 9 jaǵdaı jiti ishek ınfektsııasy, 1 jaǵdaı enterovırýsty ınfektsııa dıagnozymen tirkelgen. 1 jasóspirim jansaqtaý bólimine aýystyrylǵan, jaǵdaıy birqalypty.
Osyǵan baılanysty oblys ákimi Erbol Qarashókeevtiń tapsyrmasyna sáıkes jumysshy top qurylyp, ár balanyń jaǵdaıymen tanysyp, bolǵan jaǵdaı zerdelenip jatyr. Aýrýdyń neden shyqqany anyqtalady.
- Qazir aýrýhanada qosymsha tósek orny qajettilikke baılanysty daıyn. Dári-dármek qory jetkilikti. Búgingi kúnge Merki aýdandyq sanıtarııalyq-epıdemıologııalyq baqylaý basqarmasymen tekserý jumystary bastalyp, barlyq synamalar alynǵan, qorytyndysy endi shyǵady. Atalǵan bóbekjaı jumysy zalalsyzdandyrý jumystaryn júrgizý úshin eki táýlikke toqtatylyp, ata analarǵa eskertildi. Quzyrly organnyń tekserý qorytyndysy boıynsha tıisti sheshimder qabyldanatyn bolady, - delingen habarlamada.
Qoǵamdyq ahýal turaqty, jaǵdaı baqylaýda.
Mańǵystaý oblysynda ınfektsııadan zardap shekken 98 balanyń barlyǵy oblystyq kópbeıindi balalar aýrýhanasynyń ınfektsııalyq bólimshesinde statsıonarlyq em alǵanyn jazǵan bolatynbyz.