Jambyl oblysyndaǵy aýrýhanalardy rekonstrýktsııalaýǵa 2,4 mlrd teńge bólindi
ASTANA. KAZINFORM - Memleket basshysynyń tapsyrmalaryna sáıkes Qazaqstanda halyqtyń ómir súrý sapasyn arttyrýǵa jáne elge qaıtarylǵan zańsyz ıemdenilgen aktıvter qarajaty esebinen áleýmettik ınfraqurylymdy damytýǵa baǵyttalǵan jobalardy júzege asyrý jumystary jalǵasyp jatyr.
«Aýyldyq densaýlyq saqtaýdy jańǵyrtý» ulttyq jobasy aıasynda Jambyl oblysynyń Merki jáne Talas aýdandaryndaǵy aýdanaralyq kópbeıindi ortalyq aýrýhanalardy rekonstrýktsııalaý kózdelgen. Osy maqsatta Arnaýly memlekettik qordan 2,4 mlrd teńge bólindi.
Máselen, qaıtarylǵan aktıvterdiń bir bóligi Talas aýdandyq kópsalaly ortalyq aýrýhanany rekonstrýktsııalaýǵa baǵyttalmaq. Qarastyrylǵan qarajat kólemi – 2,3 mlrd teńge.
Al Merki aýdandyq kópsalaly ortalyq aýrýhanasynyń qabyldaý bólimshesin jóndeýge 144,9 mln teńge jumsalmaq. Qurylys jumystary sońǵy satysynda júrip jatyr. Nysandy paıdalanýǵa berý jyl sońyna josparlanǵan.
Jalpy alǵanda, 2025 jyly Arnaýly memlekettik qordan Jambyl oblysynda tórt densaýlyq saqtaý nysanyn iske qosýǵa 2,8 mlrd teńge baǵyttalǵan. Buǵan deıin Qordaı jáne Talas aýdandarynda eki dárigerlik ambýlatorııanyń qurylysy salynǵany týraly habarlanǵan bolatyn. Olardyń árqaısysy táýligine 45 kelýshige deıin qabyldaı alady.
Osyǵan deıin Jambyl oblysynyń ırrıgatsııa jáne drenaj júıelerin rekonstrýktsııalaý 91%-ǵa aıaqtalǵany týraly jazdyq.
