Jambyl oblysyndaǵy aýylda qoldanylmaı turǵan medıtsına quraldary qaıda ketti
ASTANA. KAZINFORM – Jambyl oblysy Merki aýdanyna qarasty Aspara aýylynda jańadan salynǵan dárigerlik ambýlatorııady paıdalanylmaı turǵan medıtsınalyq quraldar ózge basqa nysandarǵa beriledi.
Bul týraly Jambyl oblystyq densaýlyq saqtaý basqarmasynyń osy máselege baılanysty bergen jaýabynda aıtylǵan.
Aıta keteıik, Jambyl oblysy Merki aýdany Aspara aýylynyń turǵyny Murat Batyrbaı aýylǵa jańadan salynǵan ambýlatorııaǵa 400 mln teńge bólinip, ǵımarattaǵy medıtsınalyq quraldardy belgisiz jaqqa alyp ketkeni týraly shaǵym túsirgen.
Osyǵan baılanysty oblystyq densaýlyq saqtaý basqarmasy atalǵan másele boıynsha pikir bildirdi.
- 2024 jyldyń 30 jeltoqsanynda Aspara aýylynda jańa dárigerlik ambýlatorııa ǵımaraty salynyp, qajetti qural-jabdyqtarmen qamtamasyz etilgen. Alaıda 2025 jyldyń maýsym aıynyń alǵashqy on kúndiginde aýdandyq kópbeıindi ortalyq aýrýhanasy bas dárigeriniń mindetin atqarýshy A.K. Muhaeva bastaǵan túgendeý kezinde keıbir jabdyqtardyń paıdalanylmaı turǵany anyqtaldy. Bul quraldar basqa bólimderge qajet, - delingen jaýapta.
Aýystyrylǵan qural-jabdyqtar tizimi:
• Shprıtsti sorǵy (shprıtsevoı nasos): 6 dananyń 5-eýi – AKOA jansaqtaý bólimine;
• Infýzııalyq pompa: 6 dananyń 5-eýi – AKOA jansaqtaý bólimine;
• Tońazytqysh: 8 dananyń 5-eýi – 2 dana perzenthanaǵa, 1 dana júıke-júıe bólimine, 1 dana Andas batyr aýylyna, 1 dana Qazaqstan aýylyna;
• Defıbrıllıator: 3 dananyń 2-eýi – Surat jáne Tátti aýyldyq ambýlatorııalaryna;
• Kompıýter men prınter: 1 kompıýter jáne 2 prınter – aýdandyq emhananyń dárilik kabınetine, al Aspara ambýlatorııasynda 4 kompıýter men 2 prınter qaldyryldy;
• Dári-dármek saqtaıtyn shkaf: 10 dananyń 3-eýi – aýdandyq emhananyń dári-dármek qoımasyna;
• Magnıtoterapııa jáne kınezoterapııa jabdyqtary: ońaltý bólimine berildi.
- Bul ózgerister QR Densaýlyq saqtaý mınıstriniń 2020 jylǵy 29 qazandaǵy №QR DSM-167/2020 buıryǵyna saı, uıymdardy medıtsınalyq buıymdarmen jaraqtandyrýdyń eń tómen standarttaryna sáıkestendirý úshin jasaldy. Artyq berilgen jabdyqtar burynnan qoldanylmaǵan, - delingen habarlamada.
Osyǵan deıin Jambyl oblysynda qaıtarylǵan aktıvter esebinen aýyldyq dárigerlik ambýlatorııa ashylǵany týraly jazdyq.