Jambyl oblysyndaǵy aýyl turǵyndaryna 100 bas mal berildi

ASTANA. KAZINFORM — Jambyl oblysynda alǵashqylardyń biri bolyp Shý aýdanynyń turǵyndary mal ósirýge taýarlyq nesıe aldy, dep habarlaıdy oblys ákimdiginiń baspasóz qyzmeti.

Memleket basshysy Qasym-Jomart Toqaev óz Joldaýynda aýyl sharýashylyǵy salasyna jańa qural — «taýarlyq nesıeni» engizý máselesin qarastyrýdy tapsyrǵan bolatyn.

Jańa baǵdarlamanyń maqsaty — aýyldyq eldi mekenderde mal basyn kóbeıtý. Jambyl oblysy ákimdigi aýyl sharýashylyǵy basqarmasy basshysynyń orynbasary Tólebek Qulekeevtiń aıtýynsha, nesıe sharty boıynsha aýyl turǵyndary mal basyn odan ári ósirý úshin taýarlyq nesıe alady. Az qamtylǵan otbasylar men jumyssyz azamattardy qoldaýǵa basymdyq beriledi.

Taýarlyq nesıesi 5 jyl ishinde ótelýi kerek, onyń birinshi jyly — demalys, odan keıin jyl saıyn — tóldiń 50 paıyzy negizinde ótem tóleýge mindetteledi.

Baǵdarlamada aýyl sharýashylyǵy janýarlaryn saqtandyrý sharty jáne kepil kózdelgen, biraq bul tarmaqtar mindetti emes, tek eki taraptyń kelisimine sáıkes júzege asady.

Jergilikti kásipkerler taýarlyq nesıe berýge daıyn ekendikterin bildirdi (keminde 30 bas usaq mal, 15 bas iri qara, 10 bas jylqy).

Taýarlyq nesıeleý baǵdarlamasy aıasyndaǵy alǵashqy kelisim Shý aýdanynda jasaldy.

«Ataı» sharýa qojalyǵynyń ıesi Sáken Ataev Abaı aýylynyń turǵyny Qalısultan Tilepbergenovke 50 bas (quny — 3 mln. teńge), aýyl azamaty Baqytjan Botaevqa 3 mln. teńgege 50 bas qoı tuqymyn berdi.

— Jańa baǵdarlama turǵyndardyń ál-aýqatyn jaqsartýǵa jaqsy múmkindik beredi dep esepteımin. Aýyldastarymdy qoldap, elimizdiń damýyna úles qosýǵa ázirmin. Aldaǵy ýaqytta asyl tuqymdy maldy da berý oıymda bar, — dedi Sáken Ataev.

Qalısultan Tilepbergenov taýarlyq nesıeleý tetigin tıimdi paıdalanyp, aýyldyq aǵaıynǵa qoldaý kórsetpek.

Jańa baǵdarlama aıasynda óńirdiń barlyq aýdandarynda túsindirý jumystary júrgizilýde. Moıynqum aýdanynda «Úrker» sharýa qojalyǵy 20 bas iri qara men 100 bas ýaq mal berýge daıyn. Qazir belsendi aýyl turǵyndarynyń tizimi jınaqtalýda.

Taýarlyq nesıelendirý baǵdarlamasy aıasynda jyl sońyna deıin 80-ge jýyq kelisimge qol qoıý josparlanýda.

Buǵan deıin habarlanǵandaı, Jambyl oblysynyń bas onkologine 12 mln teńge aıyppul salyndy.