Jambyl oblysyndaǵy atys: eki adam jansaqtaý bóliminde jatyr

ASTANA. KAZINFORM — Jambyl oblysyndaǵy atys kezinde jaraqat alǵan tórt adamnyń ekeýiniń jaǵdaıy aýyr. Olarǵa birneshe ret oq tıgen, pyshaq jaraqattary anyqtalǵan. Sonymen qosa birneshe jeri synǵan, dep habarlaıdy Kazinform tilshisi.

Qalǵan eki zardap shekken adamnyń jaǵdaıy turaqty, alaıda olar da dárigerlerdiń baqylaýynda.

Jambyl oblystyq densaýlyq saqtaý basqarmasynyń málimetinshe, shildeniń 29-y kúni bolǵan oqıǵada jaraqat alǵan tórt adam Moıynqum aýdandyq ortalyq aýrýhanasyna jetkizilgen. Olar ártúrli aýyr jaraqattar alǵan — bas-súıek-mı jaraqattarynan bastap, kóptegen oq tııý men pyshaq jaraqattaryna deıin. Barlyq naýqasqa shuǵyl medıtsınalyq kómek kórsetilgen, sonyń ishinde hırýrgııalyq em júrgizildi. Qazir naýqastardyń jaǵdaıyna turaqty baqylaý júrgizilip jatyr.

— Birinshi bolyp, saǵat 21:10–da 28 jastaǵy er adam jansaqtaý bólimine túsken. Dárigerler onyń bas súıeginiń ashyq jaraqatyn, mıynyń zaqymdanýyn, rezeńke oq tıgen jaraqattaryn (basynyń joǵarǵy bóligi, keýde tusy, oń bilegi), sonymen qatar, soǵylyp, jyrtylǵan jaraqattardy, eki sanynda kóptegen pyshaq jaraqattaryn, syrtqy qan ketý men II dárejeli travmatıkalyq shokty tirkegen. Tańerteń dárigerler onyń jaǵdaıyn aýyr dep baǵalaǵan. Medıtsına qyzmetkerleriniń aıtýynsha, bul jaǵdaı jaraqattardyń kúrdeli jıyntyǵymen baılanysty, degenmen jaǵymsyz dınamıka baıqalmaıdy. Degenmen ómirlik mańyzdy kórsetkishteri — qan qysymy, pýls, dene qyzýy, tynys alý jáne ottegimen qanyǵýy — qalypty deńgeıde, — delingen habarlamada.

Ekinshi bolyp, saǵat 22:10 shamasynda 26 jastaǵy er adam jetkizildi. Onyń sol jaq bilegi, sany jáne oń qolynda oq tıgen bytyraly jaraqattar anyqtalǵan. Sonymen qatar, oń qolynyń ekinshi saýsaǵynda janshylǵan ashyq synyq bar. Budan bólek, sol jaq sanynyń janaı tıgen oq jaraqaty, oń jaq sanynyń tuıyq (oq kirip, shyqpaǵan) jaraqaty jáne sol bilektiń tesip ótken oq jaraqaty tirkelgen. Alǵashqy hırýrgııalyq óńdeýden keıin onyń jaǵdaıy aýyr, biraq turaqty dep baǵalandy. Ómirlik mańyzdy kórsetkishteri turaqty.

Qalǵan eki adam hırýrgııa bóliminde jatyr. Olardyń biri mańdaı-tóbe tusynan soǵylyp, jyrtylǵan jara alsa, ekinshisi oń qolynan tuıyq oq jaraqatyn alǵan. Ekeýiniń de jaǵdaıy turaqty, olar dárigerlerdiń baqylaýynda.

Buǵan deıin Jambyl oblysynda atys bolyp, tórt adam jaraqattanǵany habarlanǵan edi.