Jambyl oblysyndaǵy 8 aýdandyq áleýmettik qorǵaý bóliminde zańbuzýshylyqtar anyqtaldy
ASTANA. KAZINFORM — Jambyl oblysynyń turǵyndarynyń birine arba tek tekserýshiler aralasqannan keıin berilse, basqa aýdanda áleýmettik qyzmetkerdiń qyzmeti zańsyz kórsetilgen.
Birinshi jartyjyldyqta Eńbek jáne halyqty áleýmettik qorǵaý komıtetiniń Jambyl oblysy boıynsha departamenti prokýratýra organdarymen birlesip, 11 tekserý júrgizdi. Nátıjesinde segiz aýdandyq jumyspen qamtý jáne áleýmettik baǵdarlamalar bóliminiń jumysynan zańbuzýshylyqtar anyqtaldy.
— Jýaly aýdanynda bizdiń aralasýymyzdan keıin І toptaǵy múgedektigi bar azamat uzaq ýaqyt boıy negizsiz kútken kreslo-arbasyn aldy. Sarysý aýdanynda áleýmettik qyzmetkerdiń qyzmetin zańsyz kórsetý faktisi toqtatyldy. Bul bıýdjet qarajatyn únemdeýge jáne kútimge shynymen muqtaj adamdarǵa qatysty ádildikti qalpyna keltirýge múmkindik berdi, — dedi departament basshysy Aslan Orazbekov.
Vedomstvo bolǵan jaǵdaıdyń mán-jaıyn jarııalamady. Sondyqtan azamattyń kreslo-arbany qansha ýaqyt kútkeni jáne áleýmettik qyzmetkerdiń zańsyz qyzmetti qansha ýaqyt kórsetkeni belgisiz.
Departament jaýapty qyzmetkerlerdiń tártiptik nemese ákimshilik jaýapkershilikke tartylǵany týraly da aqparat bermedi.
Aıta keteıik, Jambyldaǵy múmkindigi shekteýli jandardyń shaǵymynan keıin zerthana birinshi qabatqa kóshirildi.
Buǵan deıin Qostanaı oblysynda 500-den astam nysan múmkindigi shekteýli azamattarǵa beıimdelmegenin habarladyq.
Al Shymkentte 35 jetkizýshi uıym áleýmettik qyzmetter portalynan shyǵaryldy.
