Jambyl oblysyndaǵy 73 eldi meken áli kúnge deıin tabıǵı gazben qamtylmaǵan
ASTANA. KAZINFORM – Jambyl oblysynda 73 eldi meken áli kúnge deıin tabıǵı gazǵa qosylmaǵan. Bıyl jyl sońyna deıin gazdandyrý nysandarynyń qurylysyna 8,5 mlrd teńge jumsaý josparlanyp otyr.
2025 jyly óńirdegi 10 eldi mekenniń 5 myńǵa jýyq turǵyny tabıǵı gazǵa qol jetkizdi. Jyl qorytyndysy boıynsha Jambyl jáne Jýaly aýdandaryn gazdandyrý deńgeıi 100%-ǵa, al Talas aýdanynda 94,1%-ǵa jetti.
Degenmen oblys aýmaǵynda tabıǵı gazben qamtý deńgeıi áli de birkelki emes.
Oblystyq energetıka jáne turǵyn úı-kommýnaldyq sharýashylyq basqarmasynyń málimetinshe, qazirgi ýaqytta óńirdegi 284 eldi meken tabıǵı gazben qamtamasyz etilgen. Bul eldi mekenderde 1,1 mln adam turady. Jalpy oblys halqynyń 91,8%-y kógildir otynǵa qol jetkizgen.
– Tabıǵı gazǵa qosylmaǵan 73 eldi mekendi kezeń-kezeńimen gazdandyrý jospary ázirlendi. Ony júzege asyrý úshin jetkizýshi gaz qubyrlaryn, gaz taratý stantsııalary men jelilerdi salý qajet, – dep habarlady basqarmadan.
2026 jyly taǵy 5 myńǵa jýyq turǵyndy tabıǵı gazben qamtamasyz etý kózdelip otyr. Nátıjesinde oblys halqyn gazdandyrý deńgeıin 92,2%-ǵa jetkizý josparlanǵan.
Aıta keteıik, buǵan deıin Qazaqstanda gazdandyrý deńgeıin 80%-ǵa jetkizý úshin qandaı ınfraqurylymdyq jumystar qajet ekeni týraly jazǵan edik.
