Jambyl oblysyndaǵy 12 aýyldyq okrýgte sý baǵasy tómendedi

Jambyl oblysy boıynsha Sybaılas jemqorlyqqa qarsy qyzmeti Merki aýdanynyń buryńǵy basshylyǵy kásipkerge 12 aýyldyq okrýgti (10 myńnan astam abonent) aýyz sýmen qamtamasyz etetin sý sharýashylyǵy qurylystaryn senimgerlik basqarýǵa zańsyz bergenin, sondaı-aq, onyń sý tarıfi basqa aýdandarmen salystyrǵanda áldeqaıda joǵary ekenin anyqtady, dep habarlaıdy QazAqparat.

Bul týraly departament basshysynyń birinishi orynbasary D.Omarov málimdedi.

"Departamenttiń usynysynan keıin sý sharýashylyǵy qurylystary jańadan ashylǵan «Alataý Sý-jylý» KMK balansyna qaıtarylyp, sý tarıfiniń baǵasy 40 jáne 22 teńgege tómendetildi (buryn zańdy tulǵa tekshe metr sý úshin 190 teńge, qazir 150 teńge tóleıdi, jeke tulǵalar bir tekshe metr sý úshin 104 teńge qazir 82 teńge). Qazirgi tańda, múlikti qabyldaý aktisine sáıkes jumys jasalýda.

Sonymen qatar, osyǵan deıin «Baızaq sý» KMK basshylyǵynyń aýyz sý eseptegishterine plomba ornatqany úshin 149 jeke tulǵadan jáne 8 bıznes sýbektisinen aqy alý faktisi anyqtalǵan", - dedi spıker.

Departament engizgen usynystan keıin aqy alý praktıkasy toqtatylyp, plomba ornatqany úshin tólengen aqsha kásipkerlik sýbektilerine keri qaıtaryldy, sondaı-aq, aýyz sý tarıfiniń baǵasy 5 jáne 3 teńgege tómendetildi.