Jambyl oblysynda jurtty 25 mln teńgege aldap soqqan alaıaq áıelge úkim shyqty
ASTANA. KAZINFORM – Jambyl oblysynda azamattardy ınvestıtsııadan joǵary tabys tabýǵa ýáde berip, 25 mln teńgeden astam qarjyǵa aldaǵan áıel 3 jylǵa bas bostandyǵynan aıyryldy. Alaıda sot onyń tórt kámeletke tolmaǵan balasy baryn eskerip, jazany óteýdi 5 jylǵa keıinge qaldyrdy, dep habarlaıdy Kazinform tilshisi.
Іs materıaldaryna sáıkes, sottalýshy 2024 jyly jeke kásibinde qarjylyq qıyndyqtarǵa tap bolǵannan keıin tanystarynan qarajat jınaı bastaǵan. Ol A4 formatyndaǵy qaǵazdy bilim berý uıymdaryna jetkizýmen aınalysqan, alaıda iri mámile júzege aspaı qalǵan. Buǵan qosa, ózi de alaıaqtardyń qurbany bolyp, tapsyrys berýshiler aldyndaǵy mindettemelerin oryndaı almaǵan.
Osydan keıin áıel tanystaryn qarajatty tıimdi ınvestıtsııalap, joǵary tabys tabatynyna sendirip, iri kólemde aqsha alǵan. Sonyń saldarynan jábirlenýshilerge 25 mln teńgeden astam shyǵyn keltirildi. Іs sotqa joldanǵanǵa deıin keltirilgen zalaldyń bir bóligi ótelgenimen, 12,3 mln teńge qaıtarylmaǵan.
Sot barysynda aıyptalýshy kinásin ishinara moıyndap, jasaǵan isine ókinetinin aıtty. Onyń kinási jábirlenýshilerdiń, kýálardyń aıǵaqtarymen jáne ózge de dáleldemelermen rastaldy.
Jábirlenýshilerdiń bir bóligi sottalýshynyń otbasylyq jaǵdaıyn eskerip, ony bas bostandyǵynan aıyrmaýdy surasa, endi bir bóligi memlekettik aıyptaýshynyń ustanymyn qoldady. Prokýror oǵan «Raqymshylyq jasaý týraly» zańdy eskere otyryp, 3 jyl 6 aı bas bostandyǵynan aıyrý jazasyn surady.
Sot áıeldi iri kólemde birneshe ret alaıaqtyq jasaǵany úshin kináli dep tanyp, bastapqyda 4 jylǵa bas bostandyǵynan aıyrdy. Keıin raqymshylyq týraly zańǵa sáıkes jaza merzimi tórtten birine qysqartylyp, 3 jyl bolyp belgilendi.
Sonymen qatar Qylmystyq kodekstiń 74-babyna sáıkes sottalǵannyń tórt kámeletke tolmaǵan balasy baryn eskerip, jazany óteý 5 jylǵa keıinge qaldyryldy.
Aıta keteıik, buǵan deıin Jambyl oblysynda turǵyndardy aldap, 51 mln jınaǵan erli-zaıyptyǵa úkim shyqqanyn jazdyq.
