Jambyl oblysynda júrgizýshi kýáliginen aıyrylǵan azamat qaıtadan rólge otyrǵan
ASTANA. KAZINFORM – Jol-kólik oqıǵasynan keıin júrgizýshi kýáliginen aıyrylǵan 22 jastaǵy aýyl turǵyny qaıtadan kólik tizginine otyryp, burynǵy jol apatyndaǵy qarsy taraptyń júrgizýshisine tanys bolyp qalǵan, dep habarlaıdy Kazinform agenttiginiń tilshisi.
Oqıǵa byltyr qazan aıynda bolǵan. Sol kezde jol-kólik oqıǵasy saldarynan Talas aýdanynyń jas turǵyny kináli dep tanylǵan eken. Taraz qalasynyń mamandandyrylǵan ákimshilik soty oǵan kólik quralyn basqarý quqyǵynan toǵyz aı merzimge aıyrý týraly sheshim shyǵarǵan.
Alaıda sot úkimine qaramastan, arada birneshe aı ótken soń er adam óziniń Toyota Camry avtokóligine qaıta otyrǵan. Bul quqyqbuzýshylyq baıqalmaı qalýy da múmkin edi. Biraq osy jyldyń aqpan aıynda Talas aýdany Aqkól aýylyndaǵy janarmaı quıý beketteriniń birinde ony ótken jylǵy jol apatynyń ekinshi qatysýshysy baıqap qalǵan.
Jas jigittiń júrgizýshi kýáliginen aıyrylǵanyn biletin kýáger bul týraly polıtsııaǵa habarlaǵan.
Quqyq qorǵaý organdary qyzmetkerleri aqparatty jedel tekserdi. Buǵan janarmaı quıý beketindegi beınebaqylaý kameralarynyń jazbalary dálel boldy. Kameralar kólikti basqarý faktisin naqty tirkegen.
Іs Qazaqstan Respýblıkasy Ákimshilik quqyq buzýshylyq týraly kodeksiniń 612-babynyń 3-bóligi boıynsha Talas aýdandyq sotynda qaraldy. Sot otyrysy barysynda 22 jastaǵy júrgizýshi óz kinásin tolyq moıyndady. Bul jaǵdaı sot tarapynan jeńildetetin mán-jaı retinde eskerildi.
Atalǵan bap sanktsııasy boıynsha 10 táýlikke deıin ákimshilik qamaý nemese aıyppul qarastyrylǵan. Sot aqshalaı jaza taǵaıyndaý týraly sheshim qabyldady.
Nátıjesinde kólikti zańsyz basqarǵany úshin er adam 216,5 myń teńge (50 AEK) kóleminde aıyppul tóleıtin boldy. Sot qaýlysy zańdy kúshine endi.
Eske sala keteıik, buǵan deıin Májilis depýtaty Aıdos Sarym júrgizýshi kýáliginen aıyrylǵan azamattardy ákimshilik raqymshylyqqa engizý ıdeıasyna qarsy pikir bildirgen edi.
Sondaı-aq Qazaqstanda júrgizýshiler úshin agressııaǵa tekserý engizý usynylyp otyr.
Al Semeıde júrgizýshi kýáligine qatysty alaıaqtyq faktisi anyqtaldy.
Qyzylordalyq kólik júrgizýshi 40 ret jol erejesin buzǵan.
