Jambyl oblysynda júrgizilgen aýdıt 58,5 mlrd teńge kóleminde zań buzýshylyqty áshkereledi
TARAZ. KAZINFORM — QR Joǵary aýdıtorlyq palatasy Jambyl oblysynda júrgizilgen memlekettik aýdıttiń qorytyndysyn jarııalady.
QR Joǵary aýdıtorlyq palatasynyń dereginshe, 2020-2024 jyldar aralyǵynda óńirdiń negizgi makroekonomıkalyq kórsetkishteri ósken. Alaıda Qazaqstannyń jalpy ishki óniminiń jalpy qurylymynda oblystyń úles salmaǵy 2,7%-dan 2,3%-ǵa deıin tómendegen.
— Bıyl 10 aıdyń qorytyndysy boıynsha óńirge tartylǵan ınvestıtsııalar kólemi 553 mlrd teńgeden asty, bul 2024 jyldyń osy kezeńindegi kórsetkishterden 1,4 ese joǵary. Alaıda 2020-2024 jyldar kezeńinde negizgi kapıtalǵa salynǵan ınvestıtsııalar deńgeıi boıynsha oblys respýblıkalyq reıtıng kóshbasshylarynan 3,5 ese artta qalyp otyr, — delingen habarlamada.
Jalpy Joǵary aýdıtorlyq palata júrgizgen aýdıt barysynda bıýdjettik josparlaý, memlekettik satyp alý, ınvestıtsııalyq jobalardy basqarý bóliginde, sondaı-aq «Taraz» ÁKK» AQ qyzmetinde birqatar buzýshylyq pen kemshilik anyqtaldy.
Máselen, Jambyl oblysy respýblıkalyq bıýdjetten túsetin túsimderge táýeldi. 2020-2024 jyldary bıýdjetten túsimder orta eseppen 80%-dy qurady. Osy kezeńde transfertter 344 mlrd teńgeden 521 mlrd teńgege deıin 51% ósken. Al 38 mlrd teńgeden astam somaǵa bıýdjet qarajatyn ıgermeý faktilerine jol berilgen.
Óńirdi damytýdyń 2021-2025 jyldarǵa arnalǵan baǵdarlamasynda Taraz qalasynda tazartý qurylystarynyń bolmaýy, turǵyn úı alýǵa kezekte turǵandar sanynyń ósýi jáne sýarmaly jerlerde sý únemdeý tehnologııalaryn engizý deńgeıiniń tómendigi sııaqty birqatar mańyzdy jáne ózekti problemany sheshý jónindegi kórsetkishter men is-sharalar qamtylmaǵan.
— Memlekettik satyp alý salasynda Taraz qalasynyń qurylys jáne turǵyn jaı-kommýnaldyq sharýashylyq bólimderiniń «qyzmet babynda paıdalaný úshin» degen grıfi bar shart jasasýdyń erekshe tártibin negizsiz qoldaný faktileri anyqtaldy. Bul adal básekelestikti shekteýge alyp keledi. Sonymen qatar úlestes kompanııalarmen sharttar jasasý jaǵdaılary bar, — dep habarlady Joǵary aýtorlar palatasynan.
Aýdıtorlar Taraz qalasynda jáne oblysta ınvestıtsııalyq jobalardyń iske asyrylýy nashar baqylanatynyn atap ótedi. Merdigerlerge oryndalmaǵan jumys úshin aqy tóleý jáne áli ótelmegen bereshekteri bola tura avans bergen jaǵdaı belgili bolǵan.
Mysaly, Taraz qalasynyń TKSh bólimi bıyl maýsym aıynda qalalyq avtojoldardy ortasha jóndeý boıynsha eki jobaǵa 537 mln teńgeden astam tólem jasaǵan, biraq 70 kún ótse de jumys bastalmaǵan. Atalǵan jumys tamyz aıynda aýdıt júrgizý nátıjesinde ǵana bastaldy.
Jambyl oblysy Shý aýdanynyń 18 eldi mekenine jetkiziletin gaz qubyryn salýdyń normatıvtik merzimi eki jyl bolsa da, alty jyldan astam ýaqyt boıy aıaqtalmaı keledi. Nátıjesinde 8,2 mlrd teńge ıgerilmeı, joǵary turǵan bıýdjetke qaıtarylǵan, ıaǵnı qarajat tıimsiz paıdalanylǵan.
«Taraz» áleýmettik-kásipkerlik korporatsııasynyń damý josparynda Qoǵam qyzmetiniń tıimdiligin arttyrýǵa baǵyttalǵan kórsetkishter joq. Sondaı-aq 2024 jylǵy jeltoqsanda bekitilgen kórsetkishter sany
18-den 5 birlikke deıin qysqartylyp, al qalǵandary boıynsha ındıkatorlar naqty qol jetkizilgen nátıjelerge deıin túzetilgen.
Jalpy aýdıt qorytyndysy boıynsha:
58,5 mlrd teńgege qarjyǵa qatysty zań buzýshylyqtar anyqtaldy, onyń 47,1 mlrd teńgesi býhgalterlik esep jáne qarjylyq eseptilik salasyndaǵy buzýshylyqtar;
75,6 mlrd teńge tıimsiz josparlanylǵan jáne paıdalanylǵan.
Anyqtalǵan buzýshylyqtar men kemshilikterdi joıý, laýazymdy adamdardy jaýapkershilikke tartý, sondaı-aq zańnamaǵa qajetti ózgerister engizý jónindegi jumys Joǵary aýdıtorlyq palatanyń baqylaýynda bolady.
Buǵan deıin «Samuryq-Qazyna» 122 mlrd teńgeni tıimsiz jumsaǵany anyqtalǵan edi.