Jambyl oblysynda JRVI juqtyrǵandar artty
Jambyl oblysynda jedel respıratorlyq vırýstyq ınfektsııa juqtyrǵandar artyp jatyr. Syrtqattanǵandar sany ortasha statıstıkalyq derekterden 4 ese asyp tústi, dep habarlaıdy Kazinform.
Jambyl oblystyq sanıtarııa-epıdemıologııalyq baqylaý departamentiniń aqparaty boıynsha, 2023 jylǵy 1 qazannan beri óńirde jedel respıratorlyq vırýstyq ınfektsııamen 86 myńnan astam adam aýyrǵan, onyń 64%-dan astamy 14 jasqa tolmaǵan bala.
Qazirgi epıdemıologııalyq jaǵdaı týraly Jambyl oblystyq sanıtarııa-epıdemıologııalyq baqylaý departamentiniń jetekshisi Baıdildá Shynalıev aıtyp berdi.
- Epıdemııalyq maýsym bastalǵaly tumaý aınalymyn anyqtaý úshin jedel respıratorlyq vırýstyq ınfektsııa juqtyrǵan naýqastardan 240-tan astam materıal alynyp, zertteldi. Nátıjesinde A tıpti tumaý vırýsy men basqa da tumaýǵa jatpaıtyn vırýs túrleri (paratumaý, rınovırýstar, adnovırýstar, RS-vırýstar) tarap jatqany anyqtaldy. Aýyrǵan adamdar sany boıynsha tumaý men basqa da JRVI birinshi orynda tur. Jyl saıyn kúz ben qysta tumaý men JRVI juqtyrǵandar sany artady. Oǵan, birinshi kezekte, meteorologııalyq jaǵdaı, naqtyraq aıtqanda kúnniń sýytýy, ylǵaldyń kóbeıýi sebep bolyp, aǵzanyń tabıǵı ımmýnıtetin tómendetedi, - dedi ol.
Negizgi aldyn alý sharalary retinde Baıdildá Shynalıev syrtqattanǵandar úıde qalyp, basqa adamdarǵa juqtyryp alý qaýpin tóndirmeýi qajet deıdi.
- Qoldy taza ustaý mańyzdy ról atqarady. Jıirek sabynmen jýyp, dezınfektsııa quralyn paıdalanǵan abzal. Jýylmaǵan qolmen aýyz, muryn, kózdi ustaýǵa bolmaıdy. Úı men jumysta tazalyq saqtap, jótelip júrgen adamdarmen sóılesýden qashý kerek. Jótelgen nemese túshkirgen kezde muryn men aýyzdy qolmen jabyńyz.
Uıqyny qandyryp, durys tamaqtanyp, jıi qozǵalyp, salaýatty ómir saltyn ustanǵan durys. Otyrǵan jerdiń aýasyn tazartyp, ylǵaldandyryp turyńyz. Adam kóp jınalǵan jerlerle maska taǵyńyz. Ekpe jasatý óte mańyzdy, al vırýstyq ınfektsııanyń qandaı da bir belgilerin baıqasańyz, dárigerge júginińiz, - dep keńes berdi B.Shynalıev.
Vedomstvo aqparaty boıynsha, tumaýǵa qarsy ekpe jumysy Jambyl oblysynda emıdemııa aldyndaǵy maýsymda júrgizildi, qaýip tobyndaǵy 97 522 adam ekpe aldy.
