Jambyl oblysynda joldardyń jaǵdaıyna qatysty 9,5 myń aqaý tirkeldi

TARAZ. KAZINFORM – Jambyl oblysynda jol qozǵalysy qaýipsizdigin qamtamasyz etý boıynsha júıeli jumys júrgizilip, jyl basynan beri 9500-ge jýyq aqaý anyqtaldy.

2025 jyldyń basynan beri óńirde avtojoldardy tekserý jumystary belsendi júrip jatyr. Jeti aı ishinde jalpy 2 111 tekserý ótkizilip, 14 988 shaqyrym jol jabyny qaraldy.

Tekserý barysynda búlingen jol tańbalary men jol ınfraqurylymynyń tehnıkalyq talaptarǵa sáıkes kelmeýine deıingi túrli sıpattaǵy 9 494 aqaý tirkeldi. Nátıjesinde jol uıymdaryna anyqtalǵan buzýshylyqtardy joıýǵa baǵyttalǵan 2 111 nusqama berildi.

Jambyl oblysy PD Ákimshilik polıtsııa basqarmasy jol-tehnıkalyq ınspektsııa bóliminiń bastyǵy Azamat Baqytuly joldardyń jaǵdaıy turaqty baqylaýdy talap etetinin atap ótti.

— Joldardyń kútim sapasy jol qozǵalysy qatysýshylarynyń qaýipsizdigine tikeleı áser etedi. Biz barlyq buzýshylyqtardy tirkep, olardyń qysqa merzimde joıylýyna qol jetkizemiz. Bul rette tek nusqamalarmen shektelmeımiz — jol qozǵalysy qaýipsizdigin qamtamasyz etpegeni úshin laýazymdy tulǵalar jaýapkershilikke tartylady. Adamdardyń qaýipsizdigi — bizdiń basty basymdyǵymyz, — dedi ol.

Kemshilikterdi joıý maqsatynda tıisti mekemelerge 1 084 aqparattyq hat joldandy. Nusqamalardyń oryndalýyna baqylaý josparly túrde jalǵasyp jatyr.

Avtojoldardyń qanaǵattanarlyqsyz jaǵdaıyna jáne qaýipsizdikti qamtamasyz etpeýge baılanysty oblys boıynsha 263 laýazymdy tulǵa ákimshilik jaýapkershilikke tartyldy. Buǵan qosa, berilgen nusqamalardy oryndamaǵany úshin turǵyn úı-kommýnaldyq sharýashylyq bólimderine jáne «QazAvtoJol» UK» AQ Jambyl oblystyq fılıalyna QR Ákimshilik quqyq buzýshylyq týraly kodeksiniń 462-babynyń 3-bóligi boıynsha 31 ákimshilik hattama toltyryldy.

Aıta keteıik, Jambyl oblysynda jol erejesin buzýshylardy jasyryn baqylaý júıesi engizildi.