Jambyl oblysynda jolda qalǵan 5 myń adam qutqaryldy

Jambyl oblysynda qar qursaýynda qalǵan adamdarǵa qatysty aqparat tirkelgen joq, dep habarlaıdy Kazinform.

Oblys ákimdigi baspasóz qyzmetiniń taratqan málimetterine súıensek, 15 jeltoqsan saǵat 06:00-degi jaǵdaı boıynsha 2413 adam qutqaryldy, olardyń ishinde 90 bala bar. 600-ge jýyq adam úılerine qaıtaryldy. 1813 adam alty aýyldaǵy jylytý pýnktterine jetkizildi. 3 azamat Qordaı aýdandyq ortalyq aýrýhanasyna jetkizildi. Olardyń jaǵdaılary turaqty, dárigerdiń baqylaýynda. Eki kún ishinde jalpy 5000 adam qutqaryldy.

Qutqarý jumystary jalǵasýda. Oblystyq TJ departamenti janynan jedel jeli uıymdastyryldy.

Qazirgi ýaqytta Qordaı jáne Shý aýdandarynda qosymsha 825 oryndyq 9 jylytý pýnkti uıymdastyrylǵan. Joldaǵy blok-beketterge polıtsııa narıadtary qoıylǵan.

Elektr jelileriniń qalypqa keltirý boıynsha «Jambyl elektr jelileri» JShS-men 23 avarııalyq-qutqarý toby, 27 arnaıy tehnıka jumyldyryldy. Gaz qubyrlarynyń apaty tirkelgen joq, shtatty rejımde berilýde.

Tótenshe jaǵdaılarǵa baılanysty «Shý-Otar» ýchaskesinde 11 jolaýshylar poıyzy toqtap qalǵan bolatyn. Shý aýdandyq kóliktik prokýratýranyń aqparaty boıynsha, qazirgi kezde jolaýshylar poıyzdary júre bastady, jaǵdaı baqylaýda.

Oblystyń qalǵan eldi mekenderinde jaǵdaı turaqty.

Aıta keteıik, oblys ákimi E. Qarashókeevtiń sheshimimen 2023 jylǵy 14 jeltoqsanda Qordaı jáne Shý aýdandarynyń aýmaǵynda jergilikti aýqymdaǵy tabıǵı sıpattaǵy tótenshe jaǵdaı jarııalandy.

Qalyptasqan jaǵdaıǵa baılanysty oblys boıynsha qaýyrt jeli nómirleri iske qosyldy.